काठमाडौं । स्वास्थ्य तथा जनसंख्या राज्यमन्त्री उमेश श्रेष्ठले कोभिड – १९ विरुद्धको खोपमा निजी क्षेत्रलाई प्राथमिकतामा राख्ने आश्वासन दिएका छन् । नेपाल उद्योग परिसंघको प्रतिनिधिमण्डलसँगको भेटमा उनले अर्थतन्त्र चलायमान बनाउने निजी क्षेत्रलाई खोपमा प्राथमिकता दिने बताए ।  

“सरकारले सबै नागरिकलाई निःशुल्क खोप वितरणको अभियानलाई तीव्र गतिमा अघि बढाइरहेको छ । हामी उद्योगी व्यवसायीलाई प्राथमिकतामा राखेर अघि बढ्छौँ,” उनले भने ।

उनले नेपाललाई आवश्यक पर्ने खोप खरिदको सम्पूर्ण प्रबन्ध पूरा भइसकेको पनि बताए । अबको डेढ महिनामा १ करोड ३ लाख डोज खोप नेपाल आइपुग्ने भन्दै उनले सबैलाई सहज रूपमा खोप उपलब्ध गराउने बताए ।

आगामी चैतसम्ममा ५ करोड ५० लाख डोज खोप नेपाल आउने उनको भनाइ छ ।

परिसंघका अध्यक्ष विष्णुकुमार अग्रवालले उद्योगी व्यवसायीले फ्रन्टलाइनरको रूपमा काम गरेर अर्थतन्त्रलाई चलायमान बनाइरहेको भन्दै देशभरका उद्यमीलाई खोप वितरणमा प्राथमिकता दिन आग्रह गरेका थिए । राजस्वमा करिब ७० प्रतिशत योगदान गर्ने निजी क्षेत्रलाई समयमै खोप उपलब्ध गराई चलायमान बनाउनेतर्फ सरकारले ध्यान दिनुपर्ने उनले बताए ।