अगिल्लो सरकारका त्रुटि, कमजोरी, बदमासी र बेइमानीबाट सिक्न र जोगिन सके पनि नयाँ सरकारले तिनकै अनुसरण गर्नु प्रत्युत्पादक हुन्छ । कोभिड-१९ को सङ्क्रमण नियन्त्रणमा ओली सरकारले गरेकै गल्ती दोहोर्‍याइयो भने मुलुकमा भयावह अवस्था  उत्पन्न हुनसक्छ । 

निषेधाज्ञा जारी हुँदाहुँदै पनि सङ्क्रमण बढ्नुले निषेधाज्ञाको शैलीमा गम्भीर त्रुटि रहेको अनुमान सहजै गर्न सकिन्छ । सम्भवतः नियमनको कमजोरीका कारण निषेधाज्ञामा समेत सङ्क्रमण बढ्ने क्रम नघटेको हो । मंगलबारको विवरणअनुसार २४ घन्टामा मात्रै करिब ४ हजार जना संक्रमित थपिएका छन् ।

यस्तै स्वास्थ्य तथा जनसङ्ख्या मन्त्रालयका अनुसार  नेपालमा कोभिड-१९ को थप प्रकार देखिएको छ । मन्त्रलयले सङ्क्रमण नियन्त्रण र रोकथाममा संवेदनशील हुन आग्रह गरेको छ । अर्थात्, अहिलेको स्वरुपको निषेधाज्ञा सङ्क्रमण नियन्त्रण गर्न  विफल भएको छ । 

सङ्क्रमण रोक्नका लागि खोपको व्यापक वितरणका साथै मास्कको अनिवार्य प्रयोग तथा सामाजिक दूरी कायम राख्नुबाहेक अरू उपाय देखिएको छैन ।  खोप सरकारले चाहँदैमा सबैलाई तुरुन्तै पुर्‍याउन सम्भव नहोला । यसैले मास्कको प्रयोग र भौतिक दूरीको नियमनमा पनि उत्तिकै जोड दिनुपर्ने हुन्छ ।

सरकारले किशोरावस्थाको जनसंख्याका लागि पनि खोप खरिद गर्न लागेको समाचारले केही आशा भने जगाएको छ । यद्यपि, कर्मचारीतन्त्रका भरमा पर्ने हो भने समयमा खोप आउँछ नै भनेर ढुक्क हुन सकिँदैन । 

सिरम इन्डियासँग किनेको खोपको दोस्रो खेप नआउनुमा कम्पनीमात्र हैन नेपालका कमिसनखोर र कर्मचारी पनि उत्तिकै दोषी छन् । अहिले भएकै खोपको पनि न्यायोचित वितरण हुनसकेको छैन । यसैले खोप आपूर्तिका साथै वितरणमा पनि राजनीतिक नेतृत्वको निकट सुपरिवेक्षण आवश्यक देखिएको छ ।

स्थानीय प्रशासनले निषेधाज्ञा जारी गरेपछि आफ्नो जिम्मेवारी पूरा भएको ठानेको देखिन्छ । सार्वजनिक यातायातदेखि बजारसम्म कतै पनि मास्क र भौतिक दूरी कायम भए नभएको अनुगमन भएको छैन । यही बेला विरोध र शक्ति प्रदर्शनको होड चलेको छ । 

यस्तो अवस्थामा नागरिकका मौलिक हकहरू कुण्ठित नगरी जनस्वास्थ्यका सुरक्षा मापदण्ड प्रभावकारीरूपमा लागू नगरे सङ्क्रमण कम हुँदैन । राजनीतिक नेतृत्वको निकट सुपरिवेक्षण तथा संवेदनशीलताविना जनस्वास्थ्यका सुरक्षा मापदण्ड प्रभावकारीरूपमा लागू हुनसक्ने देखिँदैन ।

जनताले जीवन र जीविकामध्ये एउटा रोज्न पर्ने अवस्था आउन नदिन शासकमा सुझबुझ र पूर्वक्रियाशीलता जरूरी हुन्छ । नवनियुक्त स्वास्थ्य तथा जनसंख्या राज्यमन्त्रीले आफ्नो सुझबुझ, व्यवस्थापन कौशल र मानवीय संवेदनशीलता प्रदर्शन गरेर आलोचकहरूलाई उत्तर दिनसक्नुपर्छ । सरकार इमानदार देखियो भने नागरिकमाथि पनि स्वास्थ्य मापदण्ड पालना गर्ने दबाब पर्नेछ ।

भारतसँगै नेपालमा पनि सङ्क्रमणको तेस्रो लहर फैलने अवश्यम्भावी छ । भारतबाट आउनेहरूको परीक्षण तथा व्यवस्थापन राम्ररी गर्न सके नेपालमा सङ्क्रमण नियन्त्रण गर्न सकिन्छ । स्थानीय तहलाई संघले शोधभर्ना दिने गरी सघाउने हो भने परीक्षण र सङ्क्रमितको व्यवस्थापन गर्न खासै कठिन पनि हुनेछैन ।   

सरकार संवेदनशील र सक्रिय हुने तथा अब विगतमा जस्तो हेलचेक्य्राइँ, अनियमितता र बेइमानी नहुने जनअपेक्षा पूरा होस् १