काठमाडौं । प्रधानमन्त्री शेरबहादुर देउवाले कोभिड–१९ को महामारी नियन्त्रणमा सहयोग गर्न निजी क्षेत्रलाई आह्वान गरेका छन् । बुधबार नेपाल उद्योग परिसंघको १८ औँ वार्षिक साधारण सभामा उनले नेपाललाई कोभिड–१९ महामारीबाट मुक्त गर्न उद्योगी तथा व्यापारीहरूले सहयोग गर्नुपर्ने बताए । कोभिड–१९ महामारीको समस्या समाधान गर्नु सरकारको कर्तव्य भएको उनले महामारी नियन्त्रणमा उद्योगी, व्यापारीहरूले हातेमालो गरे छिट्टै मुक्त हुन सकिने बताए ।

“कोभिड १९ को जनु समस्या छ, त्यो समाधानका निम्ति नेपालका उद्योगपति व्यापारीहरूले सहयोग गर्नुपर्छ भन्ने मेरो धारणा छ । कोरोना नियन्त्रणमा सरकार लाग्छ नै तपाईंहरूको पनि सहयोग भए छिटो नियन्त्रण गर्न सकिन्छ भन्ने मलाई आशा छ,” उनले भने ।

उनले कार्यक्रममा सँगै रहेको अर्थमन्त्रीलाई हेर्दै अर्थमन्त्री जनार्दन शर्मा अत्यन्त मिहेनती भएकाले मुलुकको अर्थतन्त्रमा छिटो सुधा ल्याउन सकिने पनि बताए । “हाम्रो अर्थमन्त्रीजी अत्यन्त मिहेनती हुनुहुन्छ । मलाई विश्वास छ, उहाँले नेपालको अर्थतन्त्रलाई पहिलेको भन्दा माथि उठाएर नेपालको आर्थिक अवस्थामा सुधार गर्नुहुनेछ,” उनले भने ।

प्रधानमन्त्री देउवाले कोभिड–१९ महामारीको कारण धराशायी बनेको अर्थतन्त्रको समुन्नत विकासको लागि निजीक्षेत्र र सरकारबीच हातेमालो गर्नुपर्नेमा जोड दिए ।