दाङ । बाटैभरि टमाटर, काउलीलगायतका तरकारीहरू क्यारेटका क्यारेट थुपारिएका छन् । तर ती तरकारी भने स्थानीयले किन्न खोज्दा सहज रूपले पाउन मुस्किल छ । दाङ देउखुरीका एक जना स्थानीयलाई ‘सल्यानबाट आउँदा तरकारी ल्याउनु’ भनेर फोन आएको थियो । उनले सल्यानको श्रीनगरको बाटो वरपर थुप्रै तरकारीका क्यारेटहरू भेटे तर आफूले किन्न भने किन्न भने पाएनन् ।

अन्ततः उनी तुलसीपुरमा आएर तरकारी लिन बाध्य भए । उनीजस्तै तुलसीपुरका आकाश वली पनि सल्यानमा २५ रुपैयाँ प्रतिकिलो पर्ने टमाटर दाङमा ५० रुपैयाँ प्रतिकिलो हादेर किन्न बाध्य भए । उनीजस्तै यहाँका स्थानीयले भनेको समयमा तरकारी किन्न पाउँदैनन् । सल्यानको कपुरकोटलगायत विभिन्न स्थानमा तरकारी प्रशस्त उत्पादन हुने गर्छ । तर, ती तरकारी भने व्यवसायीहरूबाहेक फुटकरमा किन्न पाउने अवस्था छैन । गाडीका गाडी तरकारी अन्य जिल्लामा जाने गरेको छ ।

“सल्यानमा २५ रुपैयाँ पर्ने टमाटर दाङमा ५० मा किन्न बाध्य छौँ, सल्यानमा फुटकरमा तरकारी पाइएन,” स्थानीय टंकप्रसाद बिकले भने । तरकारी उत्पादन हुने क्षेत्रमा ठूला व्यवसायीहरू बोटमै पुगेर खरिद गर्ने र फुटकरमा आफूहरूले विक्री गर्न नमिल्ने स्थानीय कृषक बताउँछन् ।

“लकडाउन खुकुलो भएसँगै साना–ठूला गाडीहरू पनि सञ्चालनमा भएका छन् । भाडा उही हो तर २५ किलोमिटर परबाट वर ल्याउँदा तरकारीको भाउ ५० प्रतिशत बढी छ, यसतर्फ कसैको पनि ध्यान छैन,” एक उपभोक्ताले भने ।

त्यस्तै थोक व्यवसायीहरू भने ढुवानी र तरकारीहरू अन्य जिल्लामा पुर्‍याउँदा धेरै खर्च हुने भएकाले महँगो पर्ने बताउँछन् । “यहाँ खरिद गरेको तरकारी नेपालगञ्ज पुर्‍याउँदा धेरैजसो सडेर खेर जान्छ, त्यसमा पनि भाडा लाग्छ,” व्यवसायी अनिल गुप्ताले भने ।

यसैबीच पछिल्लोपटक तरकारीको भाउ महँगिएको छ । जसको प्रत्यक्ष मारमा उपभोक्ता परेका छन् । लकडाउनको मारसँगै सर्वसाधारणलाई महँगीले पनि ढाड सेकेको छ । 

तुलसीपुरकी बालिका खड्काले अब तरकारी किनेर खान पनि सोच्नुपर्ने बेला आउन थालेको बताइन् । उनले भेडेखुर्सानी प्रतिकिलो १२०, भान्टा ८०, त्यस्तै बोडी, टमाटरको फुटकर मूल्य पनि पछिल्लो समयमा छोइनसक्नु भएको बताइन् । 

“निषेधाज्ञा खुकुलो भएसँगै जनजीवन सहज भएपछि तरकारीको भाउ घट्ने आशा थियो तर झन् महँगो भएको छ, गत सालभन्दा दोब्बर मूल्य वृद्धि भएको छ,”उनले भनिन् ।

यस्तै दैनिक थरिथरिका तरकारी पाक्ने भान्सामा महँगीसँगै सस्तो तरकारी खोजेर गुजारा चलाउनुपरेको गृहिणीहरू बताउँछन् । “तरकारीदेखि भान्सामा आवश्यक पर्ने नुन, तेल महँगो छ । कसरी दैनिकी चलाउने भन्ने समस्या छ,” गृहिणी चन्द्रीका वलीले भनिन् ।

त्यस्तै बजारमा दिन प्रतिदिन मूल्य वृद्धि हुँदा भान्सा महँगो हुने गरेको भन्दै यसतर्फ सम्बन्धित निकायको ध्यान जान नसेकेको उपभोक्ताहरूको गुनासो छ । “सबै आफ्नो दुनो सोझाउनमा केन्द्रित छन् । सर्वसाधारण जनताको हितका लागि कसैले पनि पहल थालेको छैन,” एक जना उपभोक्ताले भने ।