काठमाडौं । पछिल्ला तीन वर्षमा प्रहरीले दर्जनौँ अपराधका घटनाको सफलतापूर्वक अनुसन्धान गर्यो । तर, प्रहरीका दर्जनौँ सफल अनुसन्धानका बीच निर्मला हत्याकान्डको अनुसन्धान सधैँ टाउको दुखाइ बनिरह्यो ।
कञ्चनपुरको भीमदत्त नगरपालिका–२, उल्टाखामकी १३ वर्षीया बालिका निर्मला पन्तको ०७५ साउन १० गते बलात्कारपछि हत्या गरिएको थियो । सो घटनाका अभियुक्तको पहिचान अझै हुनसकेको छैन् । निर्मला हत्याकान्ड प्रहरी वृत्तमा मात्रै होइन, राजनीतिक वृत्तमा पनि चर्चामै छ ।
निर्मला हत्याकन्डको समयदेखि मंगलबार (हिजो)सम्म केपी शर्मा ओली प्रधानमन्त्री थिए । ओली समूहकै नेता रामबहादुर थापा ‘बादल’ गृहमन्त्री थिए । नेपाली कांग्रेस प्रमुख प्रतिपक्षी दल थियो ।
यसबीचमा दर्जनौँपटक कांग्रेस संसदीय दलका नेता शेरबहादुर देउवाले निर्मला हत्याकान्डबारे संसद्देखि सडकसम्म प्रश्न उठाए । कांग्रेसका सबैजसो नेता र सांसदले निर्मलाका हत्यारा बालुवाटारभित्रै रहेको आरोपसमेत लगाउँदै आएका थिए ।
तीन वर्ष पुग्नै लाग्दा पनि निर्मलाका हत्याराको पहिचान गर्न प्रहरी असफल रह्यो । संयोगले निर्मला हत्याकान्ड नसुल्झिएकै समयमा देउवा प्रधानमन्त्री बनेका छन् । उनकै पार्टीका नेता बालकृष्ण खाँण गृहमन्त्री बनेका छन् ।
यसअघि, निर्मलाका हत्यारा खोइ ? भनेर प्रश्न गर्नेहरु अब जवाफ दिने ठाउँमा पुगेका छन् । त्यसमाथि देउवा सुदूरपश्चिम प्रदेशकै हुन् । यस्तोमा उनको कार्यकालमा निर्मला हत्याकान्डको सफल अनुसन्धान होला त ? भन्ने जनचासो छ ।
जिल्ला प्रहरी कार्यालय कञ्चनपुरका एसपी उमाप्रसाद चर्तुर्वेदीका अनुसार हत्याकान्डको अनुसन्धान जारी छ । उनका अनुसार केन्द्रीय अनुसन्धान ब्युरो, प्रदेश प्रहरी कार्यालय र जिल्ला प्रहरी कार्यालय कञ्चनपुरको टोली अनुसन्धानमै केन्द्रित छ ।
उनले भने, “अनुसन्धानमा शून्य र सय प्रतिशत भन्ने हुँदैन । हामी गम्भीर रूपमा लागेका छौँ । सकारात्मक दिशामा अगाडि बढेका छौँ ।”
निर्मला हत्यामा संलग्न रहेको आरोपमा प्रहरीले भीमदत्त–१९, बाँगफाँटाका ३९ वर्षीय दिलीपसिंह विष्टलाई अभियुक्तको रुपमा सार्वजनिक गरेको थियो । तर, उनको डीएनए ‘म्याच’ नभएपछि उनलाई छाडिएको थियो ।
तर, दिलीपलाई पक्राउ गरेपछि कञ्चनपुरमा स्थानीयले प्रहरीविरुद्ध आन्दोलन गरेका थिए । सो आन्दोलनका क्रममा प्रहरीको गोली लागेर एकजनाको मृत्युसमेत भएको थियो ।
प्रहरीको अनुसन्धान त्रुटिपूर्ण रहेको भन्दै प्रहरी अधिकृतसमेत बर्खास्तीदेखि निलम्बनसम्म परेका थिए ।
