काठमाडौं । सामाजिक सञ्जालमा आफ्ना अभिव्यक्तिका कारण चर्चामा आइरहने ज्वाला अर्थात् टीका संग्रौला यही असार ६ गते पक्राउ परिन् । सत्तारुढ दल नेकपा (एमाले) निकट नेत्री खुश्बु घिमिरेसँग भएको विवादपछि परेको उजुरीका आधारमा प्रहरीले उनीसहित तीनजनालाई पक्राउ गर्‍यो ।

उनीसँगै उनका पति हिमाल उपाध्याय र शर्मिला वाइबा पक्राउ परेका हुन् । सुरुमा उनीविरुद्ध अभद्र व्यवहारमा प्रहरीले मुद्दा दर्ता गर्‍यो । खुश्बु र ज्वाला अर्थात् टीका कुनै समयका साथी हुन् ।

प्रहरीका अनुसार ज्वाला विदेश जानुअघि खुश्बुकै घरमा डेरामा बसेकी थिइन् । तर, पछिल्लो समय सामाजिक सञ्जालमा एकार्काविरुद्ध उनीहरुले लेखेका विषयमा विवाद भएको थियो । विवादकै बीच उनीहरु महानगरीय प्रहरी वृत्त गौशाला पुगेका थिए । सोही क्रममा दुवै पक्षबीच प्रहरी कार्यालय परिसरमै हात हालाहाल भयो ।

त्यसपछि खुश्बुले उनीविरुद्ध जाहेरी दिइन् । ज्वालालाई प्रहरीले पक्राउ गर्‍यो । सुरुमा उनीविरुद्ध अभद्र व्यवहारमा जिल्ला प्रशासन कार्यालय काठमाडौंबाट म्याद थप गरियो ।

यही बीचमा ज्वालाले महाराजगन्जमा कार्यरत प्रहरी सहायक निरीक्षक (असई) मणिकान्त झालाई रंगभेदी टिप्पणी गरेको एक भिडियो सार्वजनिक भयो । सो भिडियो सार्वजनिक भएपछि त्यसबारे चर्चा परिचर्चा सुरु भयो ।

तर, ज्वाला त्यही आधारमा मात्रै पक्राउ परेकी थिइनन् । प्रहरी अधिकारीहरु भन्छन्, “ज्वालालाई पक्राउ गर्न राष्ट्रपति कार्यालय र बालुवाटारबाट प्रहरीलाई दबाब आयो । खुश्बुसँगको झगडा त्यति ठूलो थिएन । तर, माथिबाटै दबाब आएपछि पक्राउ गर्नुपर्‍यो ।”

उनी पक्राउ परेपछि प्रहरी प्रधान कार्यालयको निर्देशनमा आफूमाथि रंगभेदी टिप्पणी गरेको भन्दै प्रहरी सहायक निरीक्षक (असई) मणिकान्त झाले पनि उजुरी दिए । कुटपिटसँगै ज्वालामाथि रंगभेदी टिप्पणीको पनि अनुसन्धान सुरु भयो । दोस्रोपटक उनीविरुद्ध जिल्ला प्रशासन कार्यालयबाट अनुसन्धानका लागि म्याद थप भयो ।

रंगभेदी टिप्प्णी गरेपछि मधेसी आयोगले पनि घटनामा चासो दियो । तर, उजुरी दिएन । एक उच्च प्रहरी अधिकारीका अनुसार सामान्य विषयलाई बढाउन नहुने भन्दै मधेसी आयोगले कानुनी प्रक्रियाका लागि पहल गरेन ।

अनुसन्धानका लागि प्रहरी हिरासतमै रहेका बेला ज्वालाले सरकारी कागजपत्र किर्ते गरेको सूचना प्रहरीसम्म पुग्यो । प्रहरीले अनुसन्धान गर्दा उनले जन्मदर्ता र विवाहदर्ताको कागजमा सरकारी छाप किर्ते गरेको भेटिएको छ ।

उनले पाँचथरबाट नागरिकता लिएकी छन् । नागरिकताको विवरण भने सही भएको प्रहरी अधिकारी बताउँछन् ।

अनुसन्धानमा संलग्न एक अधिकारीले भने, “ज्वालाका विवरण सही छन् । तर, प्रक्रिया र कागजमा किर्ते देखिन्छ । उनले गाउँपालिका स्थापना भइसकेपछि लिएका केही कागजमा गाविस लेखिएको छ । त्यही गलत हो । त्यहाँ सरकारी छाप र हस्ताक्षर किर्ते भयो ।”

किर्ते प्रकरणपछि प्रहरीले जिल्ला अदालत काठमाडौंबाट अनुसन्धानका लागि म्याद लिएको छ । उनीविरुद्ध पछिल्लो समय थपिएको म्याद शुक्रबार सकिँदै छ ।

प्रहरीका अनुसार संग्रौलाको जन्मदर्ता र उनका पति हिमाल उपाध्यायबाट नाता प्रमाणित र सम्बन्धविच्छेदको कागजमा किर्ते गरेको पाइएको छ ।