काठमाडौं । स्कोडाको एसयूभी कुशाकको बुकिङ खुला गरिएको छ । कुशाकको भारतमा मूल्य सार्वजनिक भएलगत्तै नेपालका लागि आधिकारिक विक्रेता एमएडब्लु इन्टरप्राइजेजले यसको बुकिङ खुला गरेको हो ।

कम्पनीका अनुसार नेपालमा कुशाकलाई साउनमा सार्वजनिक गरिनेछ । स्कोडा कुशाक ९५ प्रतिशत स्थानीयकरण गरेर बनाइएको एसयूभी हो । जसका कारण यसको मूल्य प्रतिस्पर्धात्मक हुने अपेक्षा गरिएको कम्पनीले जनाएको छ ।

कुशाक स्कोडाको इन्डिया २.० प्रोजेक्टअन्तर्गत सार्वजनिक गरिएको पहिलो एसयूभी हो । नेपालमा १.० लिटरको टीएसआई पेट्रोल इन्जिन भएका कुशाक भित्र्नेछन् । टीएसआई इन्जिन बहुप्रतीक्षित इन्टरनेसनल इन्जिन अवार्ड हासिल गर्न सफल इन्जिन हो ।

एसअवाडलाई अटोमोबाइल क्षेत्रका ओस्कारजस्तै मानिन्छ । यो इन्जिनले ११५ बीएचपीपावर र १७८ एनएम टर्क उत्पन्न गर्छ, जुन बेस्ट इनक्लास हो । टीएसआई इन्जिनम्यानुअल र अटोमेटिक दुवैमा उपलब्ध हुनेछ ।

नयाँ कुशाक तीन ट्रिम– एम्बिसन, एक्टिभ र स्टाइलमा क्यान्डि ह्वाइट, ब्रिलियन्ट सिल्भर, कार्बन स्टिल, हनिओरेन्ज र टोर्नेडो रेड गरी पाँच कलरमा उपलब्ध हुने जनाइएको छ ।

भारतमा १० लाख ५० हजारदेखि १७ लाख ६० हजार भारुसम्म मूल्य राखिएको नयाँ कुशाकको मूल्य नेपालमा ५० देखि ६५ लाख रुपैयाँको बीचमा रहने अनुमान कम्पनीको छ । कुशाकको प्रतिस्पर्धा हुन्डाई क्रेटा र किया सेल्टोससँग हुने कम्पनीले जनाएको छ ।