काठमाडौं । काठमाडौंको दक्षिणकाली मन्दिरस्थित पार्किङसँगैको शौचालयमा हत्या गरेर फालिएकी महिला सन्तोसी सुब्बा भएको खुलेको छ । प्रहरी अनुसन्धानमा उनको पहिचान खुलेको हो । मंगलबार (हिजो) उनको शव फेला परेको थियो ।

प्रहरीका अनुसार कालोपुलमा बस्दै आएका धनबहादुर तामाङले उनलाई धर्मछोरी बनाएर आफूसँगै राखेका थिए । तामाङलाई प्रहरीले अनुसन्धानका लागि नियन्त्रणमा लिएको छ । तर, घटनामा उनको संलग्नता भने नदेखिएको अनुसन्धानमा संलग्न प्रहरी अधिकारीहरु बताउँछन् ।

उनी धनबहादुरसँग १५/१६ वर्षदेखि बस्दै आएको देखिएको छ । प्रहरीका अनुसार उनी तीन दिनदेखि सम्पर्कमा थिइनन् । उनले धनबहादुरलाई आफू ‘गंगटो’ खोज्न जान्छु भन्दै निस्किएको महानगरीय अपराध महाशाखाका एक अधिकृतले बाह्रखरीलाई बताए । सन्तोषीको घाँटीमा सलले कसिएको र अनुहार चिन्न नसक्ने गरी किचिएको थियो ।

घटनास्थलमा एउटा बट्टामा एउटा गंगटो समेत फेला परेको छ । मास्क र चप्पल पनि प्रहरीले बरामद गरेको छ ।

अवैध सम्बन्धले हुनसक्छ हत्या
प्रहरी अधिकारीका अनुसार उनको पोस्टमार्टम रिपोर्ट आउन बाँकी छ । उनको पेट बढेको देखिन्छ । प्रहरी अधिकारीहरुले उनी गर्भवती भएको हुन सक्ने पनि आशंका गरेका छन् । अवैध सम्बन्ध खुल्ने डरले पनि उनको हत्या भएको हुन सक्ने प्रहरीको आशंका छ ।

अनुसन्धानमा संलग्न एक अधिकारीले भने, “शौचालयबाहिर झगडा भएको जस्तो देखिन्छ । केही शंकास्पदहरुको पहिचान भएको छ । हामी अनुसन्धानमा जुटेका छौँ । अभियुक्तले पहिचान नहोस् भनेर क्रुर ढंगले मुख किचेको पाइएको छ ।”

गलाबाट थरीथरीका आवाज निकाल्थिन् सन्तोषी
प्रहरीका अनुसार सन्तोषीले आफ्नो गलाबाट थरीथरीका आवाज निकाल्ने गर्थिन् । उनका केही भिडियो समेत युट्युबमा छन् । उनले कोइली, काग, कुखुरा, ढुकुरलगायतको आवाज निकालेको कतिपय भिटियो युट्युबमा भेटिन्छ ।

उनलाई धनबहादुरले बाटोमा भेटेको एक भिडियोमा बताएका छन् । एक भिडियोमा उनले भनेका छन्, “१७÷१८ वर्षअघि मैले चाबहिल चोकमा राति १० बजे भेटेको हो । उनी एक्लै थिइन् । सौतेनी आमा छ भन्थिन् । पछि आउने–जाने हुन थालेपछि छोरीजस्तै भएर बसिन् ।”