काठमाडौं । नेपालको पहिलो फ्रेन्चाइज फुटबल लिग नेपाल सुपर लिगको उपाधि काठमाडौं रेजर्सले हात पार्यो । कोरोना महामारीबीच सम्पन्न भएको प्रतियोगितामा धेरै चुनौतीहरू आए । टिम खेलाडी र प्रशिक्षकसहित आयोजकले प्रतियोगिता सम्पन्न गर्यो । पहिलो फ्रेन्चाइज लिग भएकाले केही असहज परिस्थितिहरू पनि आए । तर, परिस्थितिलाई समाधान गर्दै प्रतियोगिता सम्पन्न भयो । प्रतियोगिताको फाइनल खेलमा काठमाडौं धनगढी एफसीलाई १–० गोल अन्तरले पराजित गर्दै च्याम्पियन बन्यो ।
 
त्रिपुरेश्वरस्थित दशरथ रंगशालामा काठमाडौंलाई जित दिलाउन मेसौके ओलोमोउले निर्णायक गोल गरे । नकआउट चरणमा धनगढीसँग पराजित भएको काठमाडौं रेजर्स पहिलो प्लेअफमा पनि धनगढीसँग पराजित हुन पुग्यो । 

फाइनल खेल खेल्नु अघि काठमाडौंलाई केही असहज भने थियो । खेलाडीको मनोबल कमजोर भएको थियो । तर, काठमाडौं रेजर्सका मुख्य प्रशिक्षक बाल गोपाल महर्जनले भने खेलाडीको हौसलालाई कायम राख्न महत्वपूर्ण भूमिका खेले । एनएसएलको फाइनल खेलको एक महिना अघि महर्जनले नेपाललाई घरेलु मैदानमा त्रिदेशीय फुटबलको उपाधि जिताइ सकेका थिए । उक्त उपाधिले पनि महर्जनलाई हौसला भने मिलेको थियो । खेलाडीलाई थप हौसला दिँदै फाइनलमा उच्च मनोबलका साथ खेल्न लगाए ।
 
“फाइनलअघि हामी धनगढीसँग दुईपटक पराजित भइसकेका थियौं । खेलाडीको मनोबलमा केही कमी देखिन्थ्यो । धनगढीको उच्च मनोबलले हाम्रो खेलाडीलाई सहज बनायो । खेलअघि काठमाडौंका खेलाडी पनि उच्च मनोबलका साथ लागेका थिए,” महर्जनले भने । महर्जनले आफूहरूको खेल पहिलो चरणमा बलियो भएपनि बीचमा केही कठिनाइसँगै समूह विजेता बन्न पाएकोमा खुसी पनि लागेको बताए ।
 
लिगमा कूल ९ खेल खेलेको काठमाडौंले पाँच खेलमा जित निकाल्यो भने तीन खेलमा पराजित भयो । काठमाडौंले एक खेलमा बराबरी खेल्यो । तीन खेलमा पराजित भएको काठमाडौं दुई खेलमा धनगढीसँग पराजित भएको थियो भने एक खेलमा चितवनसँग पराजित भएको थियो । 

यसरी जित हार र बराबरी हुँदै समूह विजेता बन्दै काठमाडौंले उपाधि जित्यो । यमाहाको स्वामित्वमा रहेको काठमाडौंले लिगमा आफ्नो बेग्लै छाप छोड्न सफल भयो । प्रशिक्षक महर्जनको काठमाडौंमै उपाधि राख्ने योजना पनि सफल भयो ।

“काठमाडौंमा उपाधि राख्ने मेरो योजना सफल भयो । विभिन्न चुनौतीबीच सफल भयौं । यो अवसरमा साथ दिने सबैलाई धन्यवाद आगामी सिजन हामी थप बलियो हुँदै आउने छौं । पहिलो सिजन भएकाले केही कजोरी भए पनि यसलाई सुधार गर्ने मौका अर्काे सिजन अवश्य मिल्नेछ,” महर्जनले भने ।
 
महर्जनले घरेलु फुटबललाई व्यावसायिक बनाउन ठूला संघ संस्थाले पनि महत्वपूर्ण भूमिका खेलेको बताए । यस्तो महामारीको समयमा पनि निजी संस्थाहरू लगानी गर्न अग्रसर हुनु आफूहरुका लागि खुसीको कुरा भएको बताए ।
 
एनएसएलमा यस्तै निजी संस्थाले लगानी गर्दै गएमा आगामी यात्रा थप सहज हुने उनको विश्वास छ । उनले नेपाली फुटबलको विकासमा एनएसएलले ठूलो भूमिका खेल्ने पनि बताए । महर्जनले नेपाली फुटबलको विकासको एक नयाँ आयमका रुपमा यो प्रतियोगिता आएको र यसलाई निरनतरता दिन सके धेरै विकास हुने उनको भनाइ छ ।  

“नेपाली फुटबलमा एनएसएल नयाँ विकासको यात्रामा लागेको छ । यसलाई निरन्तरताको खाँचो छ । निजी संस्थाहरुले पनि लगानी गर्न नहिचकिचाउने हो भने एनएसएलले फुटबल विकासमा बेग्लै पहिचान बनाउने छ,” महर्जनले भने ।

महर्जनले एनएसएलको उपाधि आफ्नो व्यक्तिगत जीवनमा पनि महत्वपूर्ण भएको बताए । उनले नेपाली टोली र अन्य क्लबका लागि जति उपाधि जिताए काठमाडौंका लागि एनएसएलमा जिताएको उपाधि त्यति नै महत्वपूर्ण भएको बताए ।

नेपाली टोलीका पूर्व प्रशिक्षक रहेका महर्जन नेपाली फुटबलमा एक सफल प्रशिक्षकको रुपमा पहिचान बनाएका छन् । “नेपाली फुटबलमा मैले पाएको सफलतासँगै जोडिएको छ एनएसएलको सफलता । मैले फुटबलमा जितेका जति पनि उपाधिहरु छन् उस्तै महत्वपूर्ण छ मेरा लागि एनएसएलको उपाधि,” महर्जनले भने ।
 
सन १९९३ मा राष्ट्रिय टोलीमा डेब्यू गरेका महर्जनले देशका लागि धेरै सफलतामा महत्वपूर्ण योगदान गरेका छन् । महर्जनले नेपालका लागि खेलाडीका रुपमा जति योगदान गरेका छन् त्यति नै प्रशिक्षकको रुपमा गरेका छन् । नेपालले बंगबन्दु गोल्डकपदेखि साग उपाधि पनि महर्जनकै नेतृत्वमा जितेको छ ।