काठमाडौं । सेयर बजार दोहोरो अंकको वृद्धिसँगै बजार परिसूचक २८०० अंकनजिकको ऐतिहासिक उचाइमा पुगेको छ । सातको तेस्रो कारोबार दिन मंगलबार बजार परिसूचक नेप्से ३४.५९ अंकले वृद्धि हुँदा २७९३.८१ अंकको ऐतिहासिक उचाइमा पुगेको हो ।

बजार परिसूचक मात्रै नभएर मंगलबार कारोबार रकमले पनि इतिहास रचेको छ । नेप्सेमा एकैदिन पहिलो्पटक कारोबार रकम ११ अर्ब नाघेको छ । आज नेप्सेमा २ करोड ३० लाख २४ हजार ९२६ कित्ता सेयर किनबेच हुँदा ११ अर्ब २९ करोड ८९ लाख ४८ हजारको कारोबार भएको छ ।

गएको बिहीबार २७५९.२२ अंकको नयाँ उचाइ कायम गरेको नेप्सेले आज अर्को नयाँ रेकर्ड बनाएको हो । यसअघि, आइतबार २७३८.५ अंकमा पुग्दा  उक्त दिन पनि नयाँ रेकर्ड कायम गरेको थियो । सोमबार २७५९.२२ अंकमा बन्द भएको नेप्से मंगलबार प्रि–ओपन सेसनमा नै बढेर २५ अंकले २७८४.६ अंकमा खुलेको थियो । ‘इन्ट्र–डे’ कारोबारमा २७९४.९६ अंकको ऐतिहासिक उचाइमा पुग्दा २७६६.७१ अंकसम्म झरेको थियो ।

निषेधाज्ञाले गर्दा व्यापार–व्यवसाय ठप्प हुँदा व्यापारीहरुको बजारमा सक्रियता बढ्दा बजारमा परिसूचक र कारोबार रकम पनि उचालिएको हो । निषेधाज्ञाले सुरुमा केही त्रसित देखिएका लगानीकर्ता विस्तारै परिवेशसँग घुमिल हुँदै गर्दा बजारमा लगानीकर्ताले सक्रियता बढाएको धितोपत्र दलाल व्यवसायी भरत रानाभाट बताउँछन् ।

बजारमा व्यापारीहरुले पहिलेदेखिनै सामान्य कारोबार गर्दै आए पनि अहिले निषेधाज्ञाले गर्दा आफ्नो व्यापार–व्यवसाय बन्द भएको अवस्थामा व्यापारीहरु पनि सेयर बजारमा सक्रिय भएको उनले बताए ।

“बीचमा लगानीकर्ता निषेधाज्ञाले गर्दा अलमलमा थिए । तर, अब योभन्दा खराब अवस्था आउँदैन भन्ने भए पनि पर्ख र हेरको अवस्थामा रहेका लगानीकर्ताको सक्रियता बढेको छ । जसले कारोबार रकम बढेको हो,” दलाल व्यवसायी रानाभाटले बाह्रखरीसँग भने । व्यापारी मात्रै नभएर आईपीओको १० कित्ते नीतिले सेयर बजारमा प्रवेश गरेका साधारण मान्छे पनि अहिलेको निषेधाज्ञामा दोस्रो बजारमा सक्रिय रहेको उनी बताउँछन् ।

यस्तै, व्यापार ठप्प भएको र अन्य लगानीको अवसर नहुँदा अवस्थासँग घुलमिल हुँदै गएपछि व्यापारीहरु पनि बजारमा सक्रिय भएका छन् । अब दसैंनजिक नआएसम्म व्यापार–व्यवसाय खासै नफस्टाउने हुँदा व्यापारीहरु करिब चार–पाँच महिना सेयर बजारमा सक्रिय हुने अनुमान रहेको विश्लेषकहरु बताउँछन् ।

धितोपत्र दलाल व्यवसायी रानाभाट कारोबार रकम र बजार परिसूचक दुवै बढ्नु सकारात्मक भएको बताउँछन् ।

बजार परिसूचक नेप्सेसँगै आज ‘क’ वर्गका कम्पनीलाई मापन गर्ने सेन्सिटिभ इन्डेक्स पनि ४.६४ अंकले बढेर ४९७.२२ अंकमा पुगेको छ । आज उत्पादनमूलकबाहेकका सबै उपसमूहमा हरियाली छाएको छ । होटेल तथा पर्यटन उपसूचक सर्वाधिक ६.१५ अंकले वृद्धि हुँदा वित्त कम्पनी उपसूचक ५.८६ प्रतिशत, हाइड्रोपावर उपसूचक ३.४९ प्रतिशत र विकास बैंक उपसूचक ३.३३ प्रतिशतले वृद्धि भएको छ । बजारमा कारोबारीको रोजाइ कम पुँजी भएका र कमजोर पफर्मेन्स भएको विकास बैंक, वित्त कम्पनी र हाइड्रोपावरको देखिन्छ ।

आज कारोबारमा आएका ३३ कम्पनीको सेयर मूल्यमा सकारात्मक सर्किट लागेको छ । जसमा अधिकांश विकास बैंक, वित्त कम्पनी, होटेल र कमजोर पफर्मेन्स भएको हाइड्रोपावजर रहेका छन् ।

यता, नेपाल दूरसञ्चार कम्पनी र अपर तामाकोसीको सेयर मूल्य भने १ प्रतिशतमाथिले घटेको छ । आज कारोबारमा आएका १५८ कम्पनीको सेयर मूल्य बढेको छ । यस्तै, १८ कम्पनीको सेयर मूल्यमा गिरावट हुँदा ६ कम्पनीको भने स्थिर रहेको छ ।

कारोबार रकममा इतिहास रचेको दिने नेप्सेमा नेपाल पुनर्बिमा कम्पनीले लिड गरेको छ । कम्पनीको सेयर सात दिनयता लगातार उच्च कारोबार भइरहेको छ । कम्पनीको ६७ करोड ९३ लाखको कारोबार भएको छ । यस्तै, नेसनल लाइफको ३४१ करोड ५६ लाख ५३ हजार र अरुण काबेली पावरको ३१ करोड ४३ लाख ७६ हजारको कारोबार भएको छ ।