जनकपुरधाम । धनुषाका व्यावसायिक किसानहरूको खेतमा पाकेको खरबुजाले बजार नपाउँदा उनीहरू चिन्तित बनेका छन् ।

कोरोना संक्रमण रोकथाम तथा नियन्त्रणका लागि जारी गरिएको निषेधाज्ञाका कारण खरबुजाले बजार पाउन सकेको छैन । उनीहरूले बारीबाट खरबुजा घर त भित्र्याएका छन् तर बिक्री गर्न नपाउँदा चिन्तित बनेका हुन् ।

दैनिक आम्दानी गरेर घर व्यवहार चलाइरहेका यहाँका किसान उत्पादित फल बेच्न नपाएपछि आर्थिक संकटमा पनि परेका छन् । साहुसँग ३६ प्रतिशत ब्याजमा ऋण लिएर खेती गरेका उनीहरूलाई खरबुजा बेच्न नपाएपछि कोरोनाको त्राससँगै भोक र ऋणको चिन्ताले पनि सताउन थालेको छ ।

मिथिला नगरपालिका–६ का किसान पवित्रा साहले निषेधाज्ञा थपिँदै जाँदा चिन्ता बढेको बताइन् । पुस्तौँदेखि खरबुजा खेती गर्दै आएकी उनी निषेधाज्ञाका कारण बजार गुमेको बताउँछिन् ।

खरबुजा बेच्न नपाएपछि बिहान–बेलुका छाक टार्न पनि समस्या भएको उनले सुनाइन् । “३६ प्रतिशत दरको ब्याजमा ऋण लिएर दैनिक गुजारा चलाउँदै आएकी छु,” उनले भनिन्, “खाद्यान्न अब धेरै दिनलाई पुग्दैन । अब त ऋण दिन पनि कसैले मान्दैनन्, हामी के खाएर बाँचौँ ?”

निषेधाज्ञाका कारण १९ कट्ठा जमिनमा लगाएको खरबुजा बिक्री नभएको उनले बताइन् । केही समयअगाडि नियमित एक साता परेको अविरल वर्षाले खरबुजालाई निकै असर पारेको र वर्षाबाट जोगिएकोलाई पनि बिक्री गर्न नपाउँदा कुहिएर नष्ट हुन थालेको उनले दुखेको पोखिन् ।

खुद्रा व्यापारी पनि समस्यामा
सामान्य समयमा यहाँ फागुन, चैत, वैशाख र जेठ महिनासम्म प्रत्येक वर्ष ६० ट्रकभन्दा बढी खरबुजाको व्यापार हुने गरेको व्यापारी बताउँछन् । यो वर्ष पनि व्यापारीहरू विभिन्न स्थानबाट खुद्रा बेच्न खरबुजा लिएर राजमार्ग वरपर आएका छन् । तर, ग्राहक नपाएपछि उनीहरु चिन्तामा छन् ।

ढल्केबरमा खुद्रा बिक्रीका लागि खरबुजा थुप्रो लगाएर बसेका रौतहटको माधवनारायण नगरपालिकाका माधवनारायण चौधरी ग्राहक कुरेरै दिन कटाउँछन् । निषेधाज्ञाका कारण चौधरी मात्रै होइन, अधिकांश व्यापारी फुर्सदिला देखिन्छन् ।

कुहिएर खेर
प्रत्येक वर्ष खरबुजा बेचेर करिब १० लाख रुपैयाँ आम्दानी गर्ने गरेको भन्दै चौधरीले यो वर्ष एक ट्रक खरबुजा कुहिएर खेर गएको सुनाए । “चैतको पहिलो साता मैले चार लाख ५० हजार रुपैयाँ तिरेर एक ट्रक खरबुजा ल्याएको थिएँ । वैशाख २१ गतेदेखि लकडाउन भयो । केही दिन पूरै कडाइ रह्यो,” उनले भने, “अब खरबुजा खेतीमा लागेको लगानी पनि निस्किँदैन । चिन्ताले मलाई सताइरहेको छ ।”

अर्का व्यापारी मिथिला नगरपालिका–६ का श्याम महतोको दुखेसो पनि उस्तै छ । विगतका वर्षमा दैनिक ६० हजार रुपैयाँसम्मको खरबुजा बेच्ने गरेको बताउने उनी यसपटक बिक्री गर्नै नपाएको गुनासो गर्छन् ।

वर्षको यी चार महिनामा चौधरी र महतोजस्ता व्यापारीले राम्रो आम्दानी गर्ने गरेका थिए । तर, यसपटक व्यापार त गर्न पाएनन् नै भएको फलसमेत कुहिएर खेर फाल्नुपरेपछि चिन्तित छन् ।

ढल्केबर खरबुजा व्यापारका लागि चर्चित ठाउँ मानिन्छ । राजमार्ग भएर आउने जानेहरूले गाडी रोकेर खरबुजा किन्ने गरेको व्यापारीहरू बताउँछन् । व्यवसायीहरूका अनुसार फागुनदेखि जेठसम्म बढी व्यापार हुने खरबुजा भारतको उडिसा, बंगाल, बिहारसहित नेपालको झापा, सिरहा र धनुषालगायतबाट ढल्केबर ल्याउने गरिएको छ ।