काठमाडौं । प्रधानमन्त्री केपी शर्मा ओलीले कोरोनाको दोस्रो लहर भयावह बन्दै गएकाले अक्सिजन, भेन्टिलेटरलगायत अत्यावश्यक मेडिकल उपकरणको अभाव हुन नदिन निर्देशन दिएका छन् ।

शनिबार प्रधानमन्त्री निवास बालुवाटारमा मन्त्रीहरू, अस्पताल सञ्चालक, निजी क्षेत्रका उद्योगी, व्यवसायी, चिकित्सा क्षेत्रका विज्ञ आदि बोलाएर अक्सिजन, भेन्टिलेटर नपाएर संक्रमित मर्ने अवस्थ आउन नदिन निर्देशन दिएका हुन् ।

“प्रधानमन्त्रीले अक्सिजन आपूर्ति व्यवस्थित गर्न, आवश्यक कुराहरू सरकारसँग समन्वय गर्न निर्देशन दिनुभएको छ,” एक मन्त्रीले बाह्रखरीसँग भने, “सरकारले आवश्यक सबै प्रबन्ध गर्छ । निजी अस्पतालले पनि सरकारलाई सहयोग गर्नुपर्‍यो । नागरिकको जीवनरक्षा नै पहिलो प्राथमिकता हो भनेर कडा निर्देशन दिनुभएको छ । उहाँहरूले मुलुकभरको अक्सिजन आपूर्तिको अवस्थाबारे पनि चासो राख्नुभएको थियो ।”

जवाफमा अक्सिजन उत्पादकहरूले बाहिर प्रचार भएजस्तो हाहाकारकै अवस्था नरहेको बताएका थिए । “बाहिर मिडियाले प्रचार गरेजस्तो हाहाकार छैन । अलि बढी प्रचार भइरहेको छ । यसले पनि नागरिकहरू आत्तिएका छन्,” अस्पताल सञ्चालहरूको भनाइ उद्धृत गर्दै ती मन्त्रीले भने ।