काठमाडौं । भारतको नयाँ दिल्लीमा मे २१ देखि ३१ (जेठ ७ देखि १७)सम्म ‘एएसबीसी एलिट मेन् एन्ड वुमेन् बक्सिङ च्याम्पियनसिप २०२१ हुँदैछ । 

यो प्रतियोगितामा सहभागी हुन नेपाली बक्सिङ खेलाडीको छनोट गएको चैत २९ गतेदेखि ३१ गतेसम्म चल्यो । नेपाल बक्सिङ एशोसिएसनले गरेको छनोट प्रतियोगितामा सहभागी हुन  खेलाडी स्वयम्ले खर्च जुटाउनु पर्ने थियो । 

नेपाली खेलाडीका लागि आफैं आर्थिक जोहो गर्नु नौलो कुरा भने होइन । छनोटमा सहभागी हुनका लागि आठबुँदे मापदण्ड बनाइएको थियो । आठबुँदेले भनेझैँ भएमात्रै छनोटमा सहभागिता जनाउन पाउने भनी लेखिएको थियो । 

दुईवटा बुँदाले खेलाडीलाई कमजोर बनाइदियो । ‘खर्च’ शीर्षकमा सहभागिता जनाउने खेलाडी र प्रशिक्षकले आफ्नो खर्च आफैँ बेहोर्नुपर्ने भनियो ।  

यस्तै, ‘ड्रेस’ समेत खेलाडी आफैँले व्यवस्था गर्नुपर्ने भनिएको थियो । जहाँ सबै महिला तथा पुरुष खेलाडीले आफ्नो रातो र निलो ड्रेस तथा अन्य सामग्री आफैँ व्यवस्था गर्नु पर्नेछ, भनी उल्लेख छ । 

खेलाडीले पनि त्यसै गरे, आफ्नै खर्चमा सहभागिता जनाए । र, नतिजा राम्रै आयो, प्रतियोगिताका लागि छनोट भए । छनोट भएका खेलाडीबाट संघले विदेश जानका लागिसमेत खर्चको अपेक्षा गरिरहेको छ ।

भारतमा हुने प्रतियोगिता हाल दुवईमा गर्ने तयारी छ । दुवईमा प्रतियोगिता भएको खण्डमा नेपाल बक्सिङ एशोसिएसनले खेलाडीको खर्च धान्न नसक्ने भनी हात उठाएको छ ।  

खेलाडीहरु आफ्नो खर्च स्वयम् बेहोर्न तयार भएको खण्डमा एशोसिएसनले सजिलै प्रतियोगितामा पठाउने सोच बनाएको छ । 

“हामी आफ्नै खर्चमा छनोटमा सहभागी भयौँ । र, छनोट पनि भयाैँ । अब भारतमा हुने प्रतियोगिता दुवईमा हुने भनिएको छ । तर, सघंले हामी खर्च बेहोर्न सक्दैनौ भनिसकेको छ । खेलाडी आफैँले कहाँबाट खर्च जुटाउने ?,”प्रतियोगिताका लागि छानिएका एक खेलाडीले बाह्रखरीसँग भने । 

यसरी हरेक प्रतियोगितामा खेलाडीबाटै खर्चको अपेक्षा गर्ने खेल संघहरू नेपालमा धेरै छन् । नभन्दै बक्सिङ संघको अवस्था उदाङ्गिइहाल्यो । बक्सिङ संघका लागि यो नौलो घटना भने होइन । २० मे २०१९ देखि २४सम्म भारतमा भएको ‘सेकेन्ड इन्डियन ओपन बक्सिङ च्याम्पियनसिप’मा सहभागिता जनाएका खेलाडीबाटसमेत बक्सिङ संघले पदकको अपेक्षा गरेको थियो ।  

त्यो बेला नेपाली खेलाडीले प्रतियोगितामा सहभागिता जनाउन दुई दिनअघि भारतको यात्रा गरे । भारत जान खेलाडीले झापा हुँदै जीपको यात्रा गर्नु पर्‍यो । भोलिपल्ट अर्काे यात्रामा खेलाडीहरु रेलमा चडेर भारतको (गुहाटी) पुगे । 

२३ तारिखमा भारतको गुहाटी पुगेका खेलाडीले भोलिपल्टै २४ तारिखमा प्रतियोगितामा सहभागिता जनाउनु पर्‍यो । विश्रामको त कुरै रहेन । दुईदिन खेलेका सबै खेलाडी पहिलो चरणबाटै आउट भए । 

त्यति हुँदा पनि खेलाडीले धर पाएनन् । उल्टै दोष लाग्यो, प्रदर्शन राम्रो भएन भनेर । संघले अहिलेसम्म पनि खेलाडीले आफैँ खर्च बेहोर्नु पर्ने र त्यो पनि न्यून अवस्थामा पदकको आशा राख्ने अवस्थाको अन्त्य गर्न सकेन । अहिले पनि प्रतियोगितामा सहभागिता जनाउन आफैँ खर्च हाल्नु पर्ने अवस्था दोहोरियो ।  

यता, करातेमा पनि त्यस्तै भयो । नेपाली स्वर्णधारी कराते खेलाडी नवीन रसाइलीले खर्च जुटाउन  नसक्दा अप्रिल ३० देखि मे ३ सम्म पोर्चुगलमा हुने कराते प्रिमियर लिगमा सहभागिता जनाउन पाएनन् । 

कोरोनाका कारण प्रतियोगितामा सहभागिता जनाउन प्रतिकूलता सिर्जना भए पनि त्यसअघि नाम दर्ताकै लागि नवीनले पैसा जुटाउन सकेनन् । 

विश्व वरीयताको सयौँ स्थानमा रहेका खेलाडीले आफ्नो वरीयता सुधारका लागि प्रतियोगितामा सहभागिता जनाउने अवसर पाएका थिए । 

आयोजकले १८ जनवरीदेखि अप्रिल १५ सम्म खेलाडी दर्ताको मिति तोकेको थियो । नवीनले प्रशिक्षक र संघसँग आफ्नो नाम दर्ता गर्न सहयोगको अपिल गरेका थिए । उनले आफैँ नाम दर्ता गर्न सकेनन् । र, अवसरबाट वञ्चित भए । 

बक्सिङ कराते मात्र नभई अन्य थुप्रै विधाका नेपाली खेलाडी आफ्नै खर्चमा प्रतियोगिता खेल्न  विदेश जाने गरेका छन् । संघ लाचार छन्, जसले पैसा जम्मा गर्न सक्छ उसैलाई प्रतियोगितामा सहभागी गराउने गर्दछन् । यहाँनेर प्रतिभावान भन्दा पनि पैसा भए मात्रै प्रतियोगी बन्न पाइने चलन बसेको देखिन्छ । नेपाली खेलकुदमा यसरी गलत संस्कार हुर्किरहेको छ भने प्रतिफल शून्य छ । र, खेलाडीकै बलबुता र खर्चमा पदकको अपेक्षा गर्ने संघहरुको खारेजी किन नहुने ? भन्ने प्रश्न पनि उठेको छ ।  

तस्बिर : आइएनएस