दाङ । आगलागीबाट रोल्पामा ४२ घरगोठ जलेका छन् । त्रिवेणी गाउँपालिका–२, पिरालको गाउँ नै सखाप भएको हो ।
उक्त गाउँमा फुसका छाना भएका २६ वटा घर सबै जलेर सखाप भएको जनाइएको छ । २६ घर र १६ गोठ आगलागीका कारण सखाप भएको जिल्ला प्रहरी कार्यालय रोल्पाले जानकारी दिएको छ ।
यस वडाका विभिन्न पाँच वटा सामुदायिक वनमा सोमबारदेखि डढेलो सुरु भएको थियो । हिजो साँझ ७ बजेदेखि मानव बस्तीमै आगो लागेको थियो ।
आगलागीबाट घरमा भएका सम्पूर्ण सामान जलेर नष्ट भएको छ । १६ वटा बाख्रा, सात गाई र एउटा सुंगुर जलेर मरेका छन् ।
तत्कालीन नुवागाउँ गाविसका १, २, ३, ४ वडामा आगो फैलिएको छ । घर जलेपछि ३५ घर–परिवार खुला आकाशमुनि बसिरहेका छन् । नेपाल रेडक्रस सोसाइटी र गाउँपालिकाले चिउरा, चाउचाउ, त्रिपालजस्ता राहत दिएका छन् ।
डढेलो रुन्टीगढी गाउँपालिकाको ९ नम्बर वडाको सर्पाल र गुनाम गाउँको जंगलमा पुगेको छ । सर्पाल गुनामलगायत ठाउँका ३०० बढी घर आगलागीको जोखिममा छन् । आगलागी भएको बस्तीमा खानेपानी, बिजुली बत्ती, अवरुद्ध भएको जनाइएको छ ।
बस्तीमा लागेको आगो नियन्त्रणमा आएको भए पनि जंगलको डढेलो अझै नियन्त्रणमा आउन नसकेको रोल्पाका प्रहरी प्रमुख डीएसपी नरेशराज सुवेदीले बताए । डढेलोको नियन्त्रणका लागि नेपाल प्रहरी, सशस्त्र प्रहरी, नेपाली सेना, जनप्रतिनिधि, स्थानीय लागिपरेका छन् ।
आगलागीबाट भएको क्षतिको विवरण संकलन भइरहेको डीएसपी सुवेदीले बताए । ३०० हेक्टरभन्दा बढी जंगलमा डढेलो लागेको अनुमान गरिएको छ ।
