काठमाडौं । हिमालयन र नेपाल इन्भेष्टमेन्ट बैंक मर्जरको प्रारम्भिक सम्झौता (एमओयू) अन्योलमा परेको छ ।
मर्जरपछि बन्ने बैंकको नाम, सञ्चालक समिति, अध्यक्ष र स्वाप रेसियोजस्ता विषयमा कुरा मिले पनि इन्भेष्टमेन्ट बैंकका सीईओ ज्योतिप्रकाश पाण्डेको भूमिका के रहने भन्ने विषयमा सहमति हुन नसक्दा मंगलबार गर्ने भनिएको प्रारम्भिक सम्झौतामा हस्ताक्षरको समय केही पर धकेलिएको छ ।
माघ ९ गते बिहीबार बिहान भएको छलफलमा मर्जर कमिटीले एमओयू प्रस्ताव फाइनल गरेर ३ बजे त्यसमा हस्ताक्षर गर्ने गरि तयारी गरिएको थियो ।
दुई बैंकबीच नाम र सीईओको विषयमा केही असमझदारी भएपछि बिहीबार बिहान बसेको मर्जर समितिको बैंठकले सहमति जुटाएर ३ बजे अर्को बैठक बोलाइएको थियो ।
३ बजे नै मर्जर कमिटीले एमओयूको ड्राफ्ट फाइनल गर्ने तयारी थियो । त्यसैको तयारीस्वरुप हिमालयन बैंकले आजै सञ्चालक समितिको बैठक बोलाएको थियो ।
उक्त बैठकले एमओयू प्रस्तावलाई अनुमोदन गर्ने तयारी थियो । वैशाख १२ गते नेपाल इन्भेष्टमेन्ट बैंकको सञ्चालक समितिले अनुमोदन गरेर वैशाख १४ गते मंगलबार एमओयूमा हस्ताक्षर गर्ने तयारी दुई बैंकले गरेका थिए ।
तर बिहीबार नै संयुक्त मर्जर कमिटीको बैठकमा नेपाल इन्भेष्टमेन्ट बैंकले दुईजना सीईओ हुनुपर्ने र त्यसमा हिमालयन बैंकका सीईओ आशोक राणालाई सिनियर र इन्भेष्टमेन्ट बैंकका ज्योति पाण्डेलाई जुनियर बनाउनुपर्ने प्रस्ताव ल्याइएको स्रोतको दाबी छ ।
उक्त प्रस्तावमा हिमालयन बैंकले असहमति जनाएको थियो । एउटा बैंकमा दुईजना सीईओ हुने व्यवस्था कहिँ पनि नभएको तर्क गर्दै एकजनामात्रै सीईओ हुनुपर्ने अडान हिमालयन बैंकको छ ।
त्यसमा हिमालयन बैंकले इन्भेष्टमेन्ट बैंकलाई अध्यक्ष र आफूलाई सीईओ भन्ने विषयमा यसअघि नै सहमति जुटेको दाबी गर्दै पाण्डेलाई वरिष्ठ डेपुटी सीईओ बनाउन सकिने बताएको छ ।
यही विवादका कारण मंगलबार हुने भनिएको एमओयू अन्योलमा परेको छ ।
तर बैंकका एकजना सञ्चालकका अनुसार अझै केही दिन समय बाँकी भएकाले सहमति जुट्न पनि सक्छ ।
राष्ट्र बैंक स्रोतका अनुसार कुनै पनि बैंकमा दुईजना सीईओ राख्न मिल्दैन ।
दुई बैंकबीच मर्जरपछि बन्ने बैंकको नाममा पनि विवाद देखिएको थियो । हिमालयन बैंकले हिमालयन इन्भेष्टमेन्ट नाम प्रस्ताव गरेपछि इन्भेष्टमेन्ट बैंकले भने त्यसमा असहमति जनाएको थियो ।
इन्भेष्टमेन्ट बैकले मर्जरपछि बन्ने नाम आकर्षक हुनुपर्ने र अन्तर्राष्ट्रिय अभ्यासलाई पनि हेर्नुपर्ने भन्दै हिमालयन एन्ड इन्भेष्टमेन्टको प्रस्ताव गरेपछि हिमालयन बैंक पनि त्यसमा सहमत भएको थियो ।
त्यसपछि नाममा सहमति जुटेको ती सञ्चालकले जानकारी दिए । यद्यपी यही विषयले दुई बैंकबीच मर्जरको सम्भावना भने नटरेको दुवै बैंकका अध्यक्ष बताउँछन् ।
शुक्रबार बसेको हिमालयन बैंकको सञ्चालक समितिको बैठकमा मर्जर समितिको कुनै पनि प्रस्ताव नआएको र अर्को बैठकमा प्रस्ताव आउन सक्ने हिमालयन बैंकका अध्यक्ष तुलसीराम गौतम बताउँछन् । अर्कोसाता एमओयू हुन सक्ने गौतमले बताए ।
यता इन्भेष्टमेन्ट बैंकका अध्यक्ष पृथ्वीबहादुर पाँडे पनि चाँडै नै मर्जर सम्झौता हुने बताउँछन् । केही विषयमा छलफल चहिरेकोले केही दिनमा नै मर्जरको टुङ्गो लाग्ने उनले बताए ।
मर्जरको लागि गराएको डीडीएमा दुई बैंक एक बराबर एकको स्वापमा मर्जरमा जाने सक्ने देखिएको छ ।
डीडीएमा हिमालयन बैंक केही माथि भए पनि १ः१ मा जाने अवस्था रहेको स्रोत बताउँछ । दुई बैंक मर्जर भएमा मर्जरपछि बन्ने बैंकको पुँजीकोष ४७ अर्ब नाघ्नेछ भने चुक्ता पुँजी २६ अर्ब नाघ्नेछ ।
-1714657152.jpeg)
