काठमाडौं । नेपाली राष्ट्रिय फुटबल टोलीले लामो समयदेखि गोल गर्न सकेको छैन । त्रिदेशीय फुटबल प्रतियोगितामा पनि नेपाल गोलविहीन रहेको छ ।

घरेलु मैदानमा जारी प्रतियोगिताको दुई खेलमा नेपालले गोल गर्न सकेन । पहिलो खेल कीर्गिस्तानको यू–२३ टोलीसँग गोलरहित बराबरी खेलेको नेपालले दोस्रो खेलमा पनि गोल गर्न सकेन ।

शनिबार नेपालले बंगलादेशसँग दोस्रो खेल खेलेको थियो । उक्त खेल गोलरहित बराबरीमा सकियो । नेपालले त्रिदेशीय फुटबलमा मात्र होइन, यसअघिका पाँच खेलमा पनि गोल गर्न सकेको थिएन ।

विश्वकप छनोटदेखि मैत्रीपूर्ण खेलसम्म नेपाल गोलविहीन भएको हो । नेपाली टोलीका मुख्य प्रशिक्षक बालगोपाल महर्जनले स्कोर गर्न नसक्नु लामो समयदेखि आफूहरुको कमजोरी भएको बताए ।

उनले त्रिदेशीय फुटबलको फाइनलमा स्कोर गर्ने तरिकाले मैदानमा उत्रने बताएका छन् । खेल प्रदर्शन राम्रो भए पनि गोल गर्न नसक्नु नेपाली टोलीको पहिलेदेखि नै कमजोरी भएको र अब त्यसमा सुधार ल्याउने उनको भनाइ छ ।

“गोल गर्न नसक्नु नेपाली टोलीको पहिलेदेखि नै कमजोरी हो । हामीले गोल गर्न नसक्नुका कारण खोतल्दै आएका छौँ । समय छोटो छ । तर, अब गोल नहुनुको कारण चाँडै खोतल्ने छौँ,” महर्जनले भने ।

उनले नेपालको फरवार्ड लाइन पनि बलियो बनाउँदै स्कोर गर्ने योजनाका साथ बंगलादेशसँगको फाइनल खेलमा प्रस्तुत हुने बताए । नेपाली टोली बंगलादेशसँगको खेलसँगै लगातार सात अन्तर्राष्ट्रिय खेलमा गोलविहीन बनेको छ । विश्वकप छनोटअन्तर्गत नेपालले अन्तिमपटक चाइनिज ताईपेईसँग २–० को जित निकालेको थियो ।

उक्त खेल नै नेपालले अन्तिमपटक गोल गर्न सकेको थियो । समग्रमा नेपाली टोली आठ अन्तर्राष्ट्रिय फुटबल प्रतियोगितामा गोलविहीन भएको छ । तर, कीर्गिस्तानको यू–२३ टोलीसँगको खेल भने गणना गरिएको छैन ।

नेपालले विश्वकप छनोटअन्तर्गतको तीन खेलमा गोल गर्न सकेको थिएन । नेपाल अष्ट्रेलियासँग ५–० ले पराजित भएको थियो । विश्वकप फुटबल खेलिसकेको टोलीसँग ५–० ले पराजित हुँदा नेपालको प्रदर्शन राम्रो मानिए पनि गोल भने गर्न सकेन । त्यसपछि नेपालले जोर्डनसँग ३–० को हार व्यहोर्‍यो ।

नेपाली टोलीका खेलाडी रोहित चन्दले पछिल्लो समय गोल गर्न नसकोमा केही कमजोरी भएको बताए । टिमले उत्कृष्ट प्रदर्शन गरे पनि गोल गर्न नसक्दा त्यसको कमजोरीको विषयमा पनि छलफल भइरहेको र फाइनल खेलमा गोल गर्न नचुक्ने उनले बताए ।

“हामीले राम्रो खेल खेलिरहेका छौँ । टिमलाई नतिजा दिलाउन राम्रो खेल प्रदर्शनले मात्र नपुग्ने रहेछ । स्कोर गर्न नसक्नुको कारण खोतलीरहेका छौँ । फाइनल खेलमा अवश्य गोल गर्नेछौँ,” रोहितले पोस्टम्याच कन्फ्रेन्समा भने ।

विश्वकप छनोटअन्तर्गत नेपाल कुवेतसँग १–० ले पराजित भएको थियो । त्यसपछि नेपालले म्यानमारसँगको मैत्रीपूर्ण खेल खेलेको थियो । उक्त खेलमा पनि नेपाल पराजित भयो ३–० ले पराजित हुन पुग्यो ।

बंगलादेशको ढाकामा नेपालले दुई मैत्रीपूर्ण खेल खेलेको थियो । पहिलो खेलमा २–० ले पराजित नेपालले दोस्रो खेलमा गोलरहित बराबरीको नतिजा निकाल्यो ।

नेपालले त्रिदेशीय फुटबलमा कीर्गिस्तानविरुद्धको खेलमा गोलरहित बराबरी नतिजा निकाल्यो भने दोस्रो खेलमा बंगलादेशसँग पनि गोलरहित बराबरीमा रोकियो ।