काठमाडौं । “राष्ट्रिय टोलीलाई धेरै मिस गरेको छु,” बालुवाटारस्थित एक क्याफेमा कफीको चुस्की लिँदै रविन श्रेष्ठले आफ्नो फुटबल करियरको यात्रामा लागेको 'ब्रेक' सम्झिए । मन्द मुस्कानसँगै उनले भनेको शब्दमा पीडा प्रष्टै झल्किन्थ्यो ।

लामो समय फुटबलमा बिताएका उनी चोटका कारण चार वर्ष खेलबाट टाढा रहे । त्यसको पीडा बेग्लै हुने नै भयो । “अब नजिकिँदै छु, फुटबलसँग । मेरो जीवनमा हाल जे जति छ, त्यो फुटबलले नै दिएको हो । योबाट टाढा हुन सक्दिनँ । फुटबलबाट टाढा रहँदाको पीडा मैले महसुस गरिसकेँ,” रविनले भने ।

रविन श्रेष्ठ नेपाली फुटबलमा परिचित नाम हो । सन् २००८ देखि २०१७ सम्म उनको प्रदर्शन निरन्तर रह्यो । २०१३ मा नेपालमा भएको साफ च्याम्पियनसिपमा उनको प्रदर्शनको चौतर्फी चर्चा भयो ।

नेपाल पुलिस क्लबबाट व्यावसायिक फुटबल खेल्ने रविनले पुलिसलाई 'ए' डिभिजन लिगको उपाधि र नेपाललाई सोलिडारिटी कप र बंगबन्धु कपको उपाधि दिलाउन महत्वपूर्ण भूमिका खेले ।

उमेर समूहदेखि राष्ट्रिय टोलीसम्म उनको प्रदर्शन लोभलाग्दो भयो । “नेपालका लागि पहिलोपटक खेल्दा नै आफूले उत्कृष्ट प्रदर्शन गर्छु भन्ने सोच आयो । पहिलो खेलमा सबैको मन लोभ्याउन सकेँ । त्यसपछि राष्ट्रिय टोलीमा फर्केर हेर्नु परेन । सबै खेलमा आफूले सकेको शतप्रतिशत दिएँ,” उनले भने ।

रविनले जति प्रदर्शन राष्ट्रिय टोलीका लागि दिन चाहे, त्यो भने हुन सकेन । रविनका लागि उनको चोट बाधक बन्यो । चोटका कारण दुईपटक मैदानबाहिर रहेका रविनलाई कुनै समय पनि खेल्न छोड्छु भन्ने लागेन ।

सन् २०१७ को एएफसी एसिया कप छनोटअन्तर्गत फिलिपिन्ससँगको 'अवे' खेलका क्रममा उनी घाइते भए । नेपाललाई एएफसी सोलिडारिटी कप जिताउन महत्वपूर्ण भूमिका खेलेका उनले एसिया कप छनोटको पहिलो खेलमा चोट खेप्नुपर्‍यो । उक्त चोटको करिब नौ महिनापछि बंगलादेशको ढाकामा हुने साफ च्याम्पियन्सिपका लागि उनी टिममा परे । साफको तयारीस्वरुप थाइल्यान्डको यू–२३ टिमसँग मैत्रीपूर्ण खेल खेल्न बैंकक जाँदा अभ्यासको क्रममा रविनको चोट बल्झियो ।

उक्त चोटपछि रविनले फुटबलमा फर्कन धेरै समय कुर्नुपर्‍यो । “पहिलो चोट लागेको नौ महिनापछि फेरि चोट बल्झियो । पहिलो चोटको पीडा भुल्न नपाउँदै चार वर्ष फुटबलमा नलाग्ने गरी चोट बल्झियो । र पनि मैले खेल्न छोडिनँ । न त खेल्न छोड्छु भन्ने सोच आयो,” रविनले भने ।

ए डिभिजन लिगबाट पुनरागमन 
सन् २०१७ मा चोट लागेपछि रविनले योबीचको समय फुर्सदमा बिताए । काठमाडौंको नैकापमा घर बनाउनेदेखि परिवारसँग समय व्यतित गरे । नेपाल पुलिस क्लबका मुख्य खेलाडीका रुपमा रहेका उनले गत वर्षको ए डिभिजन लिगबाट आफ्नो फुटबलको नयाँ यात्रा सुरु गरे । पहिलो खेलमा नै उनलाई क्लब र दर्शकबाट जुन तरिकाको माया मिल्यो, त्यसले 'कमब्याक'लाई विशेष बनाइदियो ।

उनले सरस्वती क्लबविरुद्ध कप्तानको रुपमा पुनरागमनको पहिलो खेल खेले । पुलिस सहजै विजयी भयो । “चोट पूर्ण रुपमा निको भइसकेको थियो । डर त थिएन, तर पनि सानो गल्ती भयो भने आफूलाई कमजोर बनाउन सक्छ भन्ने चिन्ता भने मनमा थियो । तै पनि क्लबले पहिलो खेलमा नै कप्तानको जिम्मेवारी दिएर मैदान फर्कायो, हौसला यसै थियो,” रविनले भने ।

राष्ट्रिय टोलीमा पुनरागमनको पर्खाइ 
लामो समय उत्कृष्ट फममा रहेर राष्ट्रिय टोलीका लागि खेलेका रविन राष्ट्रिय टोलीमा कमब्याक गर्ने लक्ष्यमा छन् । त्यसको लागि राम्रो तयारी आवश्यक छ । राष्ट्रिय टोलीमा पर्नको लागि अझै धेरै खेल खेल्नुपर्ने उनी बताउँछन् ।

पुलिस क्लबमा अहिले उनी आफ्नो खेल क्षमतालाई निखार्ने र आफ्नो फिटनेसलाई बलियो बनाउन लागिपरेका छन् । “राष्ट्रिय टोलीमा कमब्याक गर्ने चाहना छ । त्यसको लागि मैले केही समय कुर्नुपर्ने हुन्छ । केही खेलहरु खेल्दै त्यसको अनुभव बटुल्न बाँकी छ । क्लबका लागि उत्कृष्ट प्रदर्शन गर्न सकेमा मात्र मैले राष्ट्रिय टोलीको ढोका खोल्न सफल हुनेछु । त्यसको लागि मसँगै क्लबका प्रशिक्षक पनि सकारात्मक हुनुहुन्छ,” रविनले भने ।

राष्ट्रिय टोलीको यात्रा 
सन् २०१३ को साफ च्याम्पियनसिपमा उत्कृष्ट खेलाडीको उपमा पाएका रविनले २००८ मा भारतको हैदराबादमा सम्पन्न एएफसी च्यालेन्स कपको फाइनल राउन्डबाट राष्ट्रिय टिममा 'डेब्यु' गरेका थिए ।

डेब्यु समय उनका लागि निकै रोचक छ । उत्तर कोरियाविरुद्धको खेलमा रविनले राष्ट्रिय टिममा मौका पाए । उनले डेब्यु गर्ने दिन नै टिममा आठजना खेलाडी परिवर्तन गरिएको थियो । आठजनामा उनी एक थिए । अघिल्लो दिन नै प्रशिक्षकले थप तयारीका लागि रविनलाई भनेका थिए । उनी उत्साहित भए । डर पनि थियो ।

“उत्तर कोरियाविरुद्धको खेलमा डेब्यु गर्नेबारे प्रशिक्षकले अघिल्लो दिन नै भन्नुभएको थियो । डर धेरै लागिरहेको थियो । मेरो रुममेट तत्कालीन कप्तान विराज महर्जन हुनुहुन्थ्यो । उहाँसँग खेल्ने सल्लाह माग्दा आफ्नो जुन तरिकाको प्रदर्शन छ, त्यही दिन सुझाउनुभयो । त्यही समयमा राति प्रशिक्षकसँग पनि कुरा गरेँ, उहाँको तर्फबाट पनि झनै हौसला मिल्यो । डर हट्यो, उत्साह जाग्यो,” रविनले डेब्युको समयलाई सम्झिए ।

उनले १७ वर्षको उमेरमा राष्ट्रिय टोलीमा डेब्यु गरेका थिए । रविनका लागि राष्ट्रिय टोलीमा सबैभन्दा रमणीय क्षण सन् २०१३ को साफ च्याम्पियनसिप हो । त्यति बेला नेपालले भरतलाई हराउँदा उनले गोलका लागि जुमानु राईलाई पास उपलब्ध गराएका थिए । नेपालले समूह चरणको खेलमा भारतलाई २–१ गोलले पराजित गरेको थियो । समूह ‘ए’को विजेता बन्दै सेमिफाइनलमा पुगेको नेपाल अफगानिस्तानसँग १–० ले हार्दै बाहिरिएको थियो ।

घरेलु मैदानमा भएको साफ च्याम्पियनसिपमा देशलाई उपाधि दिलाउन नसक्नु उनका लागि सबैभन्दा दुःखको क्षण हो । रविनको अबको लक्ष्य पनि नेपाललाई साफ च्याम्पियनसिपको उपाधि दिलाउनु हो ।