काठमाडौं । हामी सोच्छौँ– सरकारमा रहेकाहरूसँग सही, तथ्यपरक र वस्तुनिष्ठ सूचना हुन्छ । त्यही आधारमा उसले योजना बनाउँछ । राज्यसत्ता परिचालन गर्छ । तर, प्रधानमन्त्रीका पटकपटकका अभिव्यक्तिले त्यसको खारेज गरिरहेको छ । समाचार तथ्यपरक भएन भनेर प्रधानमन्त्रीले नै दैनिकजसो सञ्चारमाध्यमलाई आरोप लगाउने गर्छन् । 

तर, प्रधानमन्त्री स्वयम् गलत सूचना र ‘फेक न्युज’बाट प्रताडित छन् भनेर बुझ्न कठिन छैन । उनका भाषणहरू नै त्यसका प्रमाण हुन् ।

प्रधानमन्त्री ओलीले पछिल्लो समय पटक–पटक ‘फेक न्युज’ र ‘फेक सूचना’को सहारा लिइरहेका छन् । पुष्टि नभएका समाचार र सूचनालाई आधार मान्दै प्रधानमन्त्री ओली सार्वजनिक कार्यक्रममै आफ्ना विरोधीमाथि खनिँदै आएका छन् ।

रोचक, आश्चर्यकको कुरा त त्यही भाषणमा प्रधानमन्त्रीले सबैभन्दा बढी ताली पाइरहेका  छन् । र, विभाजित नेकपाका नेता–कार्यकर्ता प्रधानमन्त्रीको त्यही भाषणमा हर्षित देखिन्छन् ।

माघ २२ गते प्रचण्ड–नेपाल समूहले संवैधानिक निकायका पदाधिकारीको नियुक्तीलाई लिएर देशव्यापी आमहड्ताल गर्‍यो । आमहड्तालका क्रममा काठमाडौंमा एक ट्याक्सीमा आगो झोसियो भने देशका विभिन्न स्थानमा सवारी साधनमाथि तोडफोड भयो । सामाजिक सञ्जालमा आमड्तालका विभिन्न तस्बिर ल्याइए ।
तीनैमध्ये सडकमा तरकारी फालिएको एउटा तस्बिर सामाजिक सञ्जालमा ‘भाइरल’ बन्यो । ओली समूहका नेता–कार्यकर्ताका लागि त्यो तस्बिर अर्को समूहलाई लाञ्छित गर्ने, होच्याउने र उछित्तो काढ्ने माध्यम बन्यो ।
जबकि, त्यो तस्बिर फेक थियो । नेपालको छँदै थिएन ।

सामाजिक सञ्जालमा भित्र्याइएको त्यो तस्बिर सन् २०१७ को जुनको हो । भारतको महाराष्ट्र राज्यमा किसान आन्दोलन चर्किएका बेलाको हो । त्यतिबेला महाराष्ट्रका किसानले आफ्नो खेत–खलियानमा उत्पादन भएका तरकारी सडकमा फ्याँकेर विरोध जनाएका थिए ।

तर, नेपालको आमहड्ताल भनेर ओली समूह र ‘साइबर सेना’ले प्रचार गर्‍यो । प्रधानमन्त्रीले त्यसैलाई माध्यम बनाएर प्रचण्ड–माधव नेपाल समूहको उछित्तो काढे ।

आमहड्तालकै दिन एउटा सार्वजनिक कार्यक्रममा प्रधानमन्त्री ओलीले भने, “बूढी आमाका डोकाका टमाटरहरू बाटाभरी छरिए । काउली फ्याकिदिएर, मुला फ्याकीदिएर, कत्रो क्रान्ति गर्न खोज्या ? ती बूढी आमाले प्रचण्डले भनेको जस्तो प्रतिगमन नै गर्न खोज्या हुन त ? संविधान च्यात्नै खोजेकी हुन् त ती बूढी आमाले ।”
प्रधानमन्त्रीले तरकारी फालेको भाषण गर्दा कार्यकर्ताले हुटिङ र ताली बजाए । तर, प्रधानमन्त्री स्वयम्ले कुन जिल्ला, कुन क्षेत्रमा तरकारी सडकमा फालियो खुलाउन सकेनन् । 

गत महिना पूर्वगृहमन्त्री समेत रहेका प्रचण्ड–नेपाल समूहका नेता भीम रावलले कैलालीमा आयोजित एक कार्यक्रममा ओलीको शरीरमा ‘स्त्रीको अङ्ग’ मिसिएकोले दिमागले काम गरेन भनेको भन्दै सामाजिक सञ्जालमा यो विषय भाइरल बन्यो । नेकपा नेता–कार्यकर्ताले भीम रावलमाथि गालीको वर्षा गरे, सामाजिक सञ्जालमा । 

काठमाडौंमा केही समय अगाडि आयोजित ओली निकट पत्रकाहरुको भेलादेखि अन्य विभिन्न सार्वजनिक कार्यक्रममा उनले रावलको खेदो खने । प्रधानमन्त्री ओलीले विभिन्न कार्यक्रममा भनेका छन्, “महिलाको किड्नी राखेका कारण दिमाग खुस्कियो भनेछन् । महिलामाथि कत्रो अपमान !”

नेता भीम रावलले पनि यसको खण्डन गरिसकेका छन् । भीम रावलले भनेको यो विषयको अडियो–भिडियो छैन । मुलधारका सञ्चारमाध्यममा पनि यो विषय आएन । जसले समाचार छापेको थियो, मोफसलमा । उसले पनि माफी मागेर समाचार हटाइसकेको छ । 

तर, प्रधानमन्त्रीले त्यो विषयमा भीम रावललाई कटाक्ष गर्न छाडेका छैनन् । प्रधानमन्त्रीको पार्टीका सबैजसो नेताहरू भीम रावलप्रति खनिनुपर्‍यो भने त्यही विषय निकाल्छन् ।

यसबाहेक अन्य कतिपय विषयमा समेत प्रधानमन्त्री ओलीले ‘फेक न्युज’ र ‘फेक’ तथ्याङ्कको साहारा लिन खोजेको देखिन्छ । 

प्रधानमन्त्री निकट मानिएकैहरू भन्छन्,“उहाँ सीमित व्यक्तिको घेरामा हुनुहुन्छ । सबै सूचना उहाँसम्म पुग्दैनन् । नजिक रहेकाले उहाँ खुसी हुने सूचना मात्रै सुनाउँछन् । उहाँको सूचना लिने प्रणाली नै गलत छ । त्यसैले ‘फेक’ कुरा पनि उहाँले पत्याउनुहुन्छ ।”