बष्टन(अमेरिका) । क्रिसमस झिलीमिली बत्तीहरुको चाड हो । यतिबेला अमेरिकीहरुले आफ्ना घर र चोकहरु विभिन्न रंगका बत्तीहरुले झकिझकाउ बनाएका हुन्छन् । कोभिडका कारण यो वर्षको क्रिसमसमा खासै रौनक छैन । यद्यपी घरमा नै बस्न बाध्य अमेरिकीहरुले पहिलेका वर्षहरुभन्दा यो वर्ष क्रिसमसको समयमा घर सजावटमा बढी ध्यान दिएको देखिन्छ । 

पहिले क्रिसमस ट्रि र बत्तीको सजावट हेर्न भिडभाड हुने स्थानहरुमा यो वर्ष त्यसप्रकारको आयोजन बष्टनमा गरिएको छैन ।  फेन्यूअल हल मार्केटप्लेसले बष्टनको क्विन्सी मार्केटमा क्रिसमसको बेला गरिने सजावटलाई यो वर्ष बन्द गरेको छ ।  कोभिडको संक्रमणलाई बढ्न नदिन मानिसहरुको भीडलाई कम गर्न यस्तो निर्णय गरिएको मार्केटप्लेसले आफ्नो सामाजिक सन्जालमा बताएको थियो । 

क्विन्सी मार्केट परिसरका रुखहरुमा सुन्दर लाइटहरुको सजावट हेर्न लायक हुने गर्दथ्यो ।  यो वर्ष न ती रुखहरुमा चम्किला लाइट बेरिएका छन् न त अग्लो क्रिसमस ट्रि नैं ठड्याइएको छ त्यहाँ । बस्टनको क्रिसमस यो वर्ष चिसो र निर्जन छ । यो वर्षको क्रिसमससम्ममा कोभिडबाट झण्डै ३ लाख २९ हजार अमेरिकीहरुले ज्यान गुमाइसकेका छन् । 

मृतकका आफन्तहरुले यो वर्ष हालसम्मकै सबैभन्दा नरमाइलो क्रिसमस मनाउँदैछन् । धेरै राज्यहरुको अस्पतालहरु कोभिडका बिरामीहरुका कारण फूल अकुपेन्सीमा चलेका समाचारहरु आइरहेका छन् ।  एकातिर कोरोनाविरुद्धको भ्याक्सिन चरणबद्ध रुपमा लगाउन थालिसकिएको छ भने अर्कोतिर त्रास कायमैं छ ।