नायगरा फल्स (क्यानडा) । गत जुलाइ महिनादेखि नायगरा फल्सलाई पहिलोपटक यसको सुरुङ मार्गबाट पनि हेर्न सकिने व्यवस्था गरिएको रहेछ । 

नायगरा नदी किनारमा रहेको टनेलको मुखबाट देखिने दृष्य झन् मनमोहक नै छ । अमेरिका र क्यानडातर्फबाट देखिने दृष्य भन्दा फरक छ त्यहाँबाट देखिने दृष्य ।

नायगरा फल्स हेर्न आउने आन्तरिक तथा बाह्य पर्यटकहरुले वार्षिक रुपमा झन्डै दुइअर्ब ४० करोड डलर बराबर खर्च गर्ने गरेका छन् जुन यहाँको स्थानीय अर्थतन्त्रको लागि उल्लेखनीय आम्दानी हो । 

नायगरा इकोनोमिक डेभलोपमेन्टका अनुसार वर्षेनी १ करोड ७० लाख मानिसले नायगरा फल्समा भ्रमण गर्ने गर्दछन् जसमध्ये अमेरिकाबाट ३० लाख मानिस र अरु देशबाट १० लाख मानिस यो विशाल झरना हेर्न आउने गरका छन् । 

पृष्ठभूमिमा नायगरा फल्सलाई राखेर सेल्फी खिच्ने, पारिवारिक वा व्यक्तिगत फोटोहरु खिच्ने खिच्न लगाउने, डीएसएलआर क्यामेरा बोकेर फोटो खिचिरहेका दृष्यहरु हर प्रहर सामान्य हुन् । 

रातमा पनि त्यहाँ रंगीचंगी प्रकाश दिइएको हुन्छ जसले नायगरालाई थप मनमोहक बनाइदिन्छ । विभिन्न समयमा हुने फायर वर्क्सले त नायगराको शोभालाई झन् बढाएको देखिन्छ । 

यस्ता गतिविधिले यहाँ आउने पर्यटकको बसाइको समयलाई लम्ब्याएको छ । समर सिजनका हरेका राति दश बजे फायर वर्क्स हुने गर्दछ ।  

स्वच्छ निलो आकाश र घमाइलो दिनमा त झन् त्यहाँ एकजोर इन्द्र धनुष नै देखिन्छन् । तल्लो इन्द्रेणी चम्किलो हुन्छ भने माथिल्लो इन्द्रेणी फिक्का हुन्छ ।