काठमाडौं । कर्णाली प्रदेश क्रिकेट टोलीका कप्तान रवीन्द्रजङ शाहीले गएको सिजन प्रधानमन्त्री कपमा उत्कृष्ट प्रदर्शन गरे । उनको प्रदर्शनले कर्णालीका क्रिकेट खेलाडीको कुशलता उजागर गर्‍यो । त्यसो त रवीन्द्रले नेपालका लागि यू–१६ र यू–१९ क्रिकेट प्रतियोगिता खेलिसकेका छन् ।

सन् २०१४ को एसीसी यू–१६ क्रिकेटमा उनी नेपाली टोलीमा परे । पहिलोपटक अन्तर्राष्ट्रियस्तरको प्रतियोगिता खेलेका उनले सकेजति प्रदर्शन गरे । सन् २०१६ मा एसीसी यू–१९ क्रिकेट पनि खेले । त्यतिबेलै रवीन्द्रको प्रदर्शन आशालाग्दो देखिएको थियो । उनले २०१८ मा पनि यू–१९ टोलीको प्रतिनिधित्व गरे ।

उनीजस्तै कर्णालीका धेरै खेलाडी राष्ट्रिय टोलीमा अटाउनका लागि आतुर छन् । उचित अवसरको पर्खाइमा छन् ।

रवीन्द्रको कप्तानीमा कर्णाली क्रिकेट टोलीले प्रधानमन्त्री कपमा गरेको प्रदर्शन सबैको नजरमा गर्‍यो । राम्रो तयारी गरेको टोलीका अगाडि प्रदर्शन फिका भए  पनि कर्णालीमा क्रिकेट खेलाडी उत्पादनको प्रचुर सम्भावना उनीहरुले प्रमाणित गरेर देखाए । प्रतियोगिता सुरु हुने केही दिनअघि तयारी गरेर गरेको प्रदर्शनलाई सबैले स्याबासी दिए ।

“कर्णालीमा क्रिकेटको धेरै सम्भावना छ । मैले पनि क्रिकेट करिअरको सुरुआत कर्णालीबाट नै गरें । हामीमा खेल्ने क्षमता छ । यो हामीलाई थाहा छ । तर, यस्तो कुनै अवसर पाएको छैनौं, जुन कर्णालीमा क्रिकेट खेल्ने वातावरण बनोस्,” रवीन्द्रले बाह्रखरीसँग भने ।

रवीन्द्रको टोलीले आउँदो पुस ११ गतेबाट राजधानीमा आयोजना हुने प्रधानमन्त्री कप क्रिकेट पनि खेल्दैछ । अघिल्लो सिजनभन्दा योपालि प्रदर्शनमा केही सुधार आउने उनको आशा छ । नयाँ क्रिकेट खेलाडी उत्पादन भएका कारण पनि प्रदर्शनमा सुधार आउने उनी बताउँछन् ।

प्रदेशमै खेलाडी उत्पादनको कुरामा भने सरोकारवालाले ध्यान नदिएको उनको गुनासो छ ।

“गत वर्षभन्दा यो सिजन क्रिकेट खेलाडीहरु कर्णालीमा धेरै देखिएका छन् । तर, स्थानीय तहमा कुनै प्रतियोगिता या एकेडेमी खोलेर खेलाडी उत्पादन गर्ने कुरामा भने पुरानै अवस्था छ । राजधानीमा रहेका र एकेडेमीमा रहेका खेलाडीले मौका पाउने अवस्था छ,” रवीन्द्रले भने ।

महिला टोलीमा पुरानै अनुहार

कर्णालीमा महिला क्रिकेट टोलीको अवस्था अझ नाजुक छ । गएको सिजन प्रधानमन्त्री कपमा टोलीको प्रदर्शन निकै कमजोर रह्यो । व्यावसायिक खेलाडी थिएनन् । अधिकांश विद्यालयस्तरमा क्रिकेट खेल्दै गरेका खेलाडीले प्रदेश टोलीमा स्थान बनाएका थिए ।

यो सिजनमा भने केही राम्रो प्रदर्शन गर्ने आशा खेलाडीको छ । कर्णालीकी कप्तान लक्ष्मी पुरीले धेरै खेलाडी उत्पादन हुन नसकेकाले योपटक पनि पुरानै अनुहार मैदानमा उत्रने बताइन् ।

“प्रदेशमा धेरै महिला खेलाडीको उत्पादन छैन । त्यति क्रिकेट प्रतियोगिता पनि हुँदैन । क्रिकेट सिक्न पनि बाह्रै महिना क्रिकेटको प्रशिक्षण हुने एकेडेमी छैनन् । पुरुषहरुका लागि क्रिकेट सिक्ने माहोल भएपनि महिला क्रिकेटका लागि उचित माहोल छैन । न त कुनै एकेडेमी नै छ । त्यसैले यो सिजन पनि पीएम कपमा धेरै पुराना अनुहार देखिने पक्का छ,” लक्ष्मीले बाह्रखरीसँग भनिन् ।

दैनिक प्रशिक्षण र एकेडेमी भए राम्रा खेलाडीहरु आउने उनको विश्वास छ । कर्णालीको सुर्खेतमा मात्र क्रिकेट खेलाडी र प्रशिक्षणको चार्म छ । अरु जिल्लामा पनि खेलाडी उत्पादनको माहोल बनेमा राम्रा खेलाडीहरुको सम्भावना रहेको उनले बताइन् ।

“महिला क्रिकेटमा कर्णाली प्रदेश पछि नै छ । प्रदेशको एकमात्र जिल्ला सुर्खेतमा क्रिकेटको माहोल छ । त्योबाहेक अन्य जिल्लामा खेलाडी उत्पादनको राम्रो सम्भावना छ,” लक्ष्मी भन्छिन्, “सबै जिल्लाको प्रतिनिधित्व हुनेगरी खेलाडी उत्पादन भएमा टिम राम्रो बन्नेछ । प्रदर्शनको स्तर पनि राम्रो हुनेछ । त्यसको लागि सरोकारवाला निकायले चासो दिन आवश्यक छ ।

कर्णालीमा हाल कर्णाली प्रिमियर लिग पुरुष क्रिकेट आयोजना हुने गरेको छ । महिला लिग हुँदैन । काठमाडौंमा हुने वुमन्स प्रिमियर लिग (डब्लूसीएल)मा पनि कर्णालीका खेलाडीको कमै प्रतिनिधित्व हुने गरेको छ ।