चितवन । यही असार १४ गते एक, पाँच र सात नम्बर प्रदेशमा हुन लागेको स्थानीय तह चुनावका लागि आज उमेदवारी दर्ता भइरहेको छ । गत वैशाख ३१ गते तीन प्रदेशका २ सय ८३ स्थानीय तहमा निर्वाचन भइसकेको छ । सबै तहले जनप्रतिनिधि पनि पाए, तर चितवन भरतपुरका मतदाताले चुनाव भएको एक महिना पाँच दिन बितिसक्दा पनि प्रमुख, उपप्रमुख पाउन सकेका छैनन् । 

त्यसो त भरतपुर महानगर माओवादी केन्द्रका अध्यक्ष तथा पूर्व प्रधानमन्त्री पुष्पकमल दाहालकी पुत्री रेणु दाहाल प्रमुख पदमा उठेकाले पनि चर्चामा छ । व्यवस्थापिका संसद्को पहिलो दल नेपाली कांग्रेसले पनि दाहाललाई सघाएको छ ।

मतगणनाका क्रममा १९ नम्बर वडाको ९० वटा मतपत्र च्यातिएपछि भरतपुर महानगर अनिर्णयको बन्दी बनेको छ । निर्वाचन आयोगले पनि यसै गर्ने भनेर निर्णय लिन सकेन । यो विषय अहिले सर्वोच्च अदालतमा विचाराधीन छ । 

सर्वोच्च अदालतले पनि निर्णय लिन हिच्किचाइरहेको भरतपुरका मतदाताको आक्रोश छ । भरतपुर–२० का इन्द्रकुमार राई अदालतले खुट्टा कमाएको ठान्छन् । भन्छन्, “चुनाव भएका तहले जनप्रतिनिधि पाएर कार्यभार सम्हालिसक्दा पनि भरतपुरले प्रमुख, उपप्रमुख पाउन सकेको छैन, यो राष्ट्रिय लज्जाको विषय हो ।”

उनले चुनाव भएपछि परिणाम स्वीकार्न हिच्किचाउन नहुने जिकिर गरे । “आज १९ नम्बरको च्यातियो । त्यहाँ चुनाव त गरौँला । भोलि २० नम्बरको पनि च्यातियो भने के गर्ने ?” उनको प्रश्न थियो । उनले मतपत्र च्यात्नेको मनोबल बढाउन पनि कुनै हालतमा चुनाव गर्न नहुने जिकिर गरे ।

भरतपुर–३ मा कुशल श्रेष्ठले भरतपुर–१९ का सन्दर्भमा छिटो निर्णय लिइनुपर्ने बताए । “चुनाव भएका ठाउँका मतदाताले प्रतिनिधि पाइसक्दा यहाँका मतदातामा निराशा छाएको छ । भोट हाल्दा पनि प्रमुख, उपप्रमुख नपाउनु दुःखद् कुरा हो, " उनले भने । वडा नं. ३ मा कांग्रेसले विजय हात पार्यो । मतगणनाका क्रममा धाँधली भएको भन्दै उजुरी परेपछि अदालतले शपथ नखुवाउन आदेश दिएपछि वडा नम्बर ३ ले पनि प्रतिनिधि पाउन सकेको छैन ।

श्रेष्ठले पनि ९० मत बदर गराएर मतगणना गर्नुपर्ने तर्क गरे । अन्यथा चुनावको शृंखला नरोकिने उनको दाबी थियो ।

यता भरतपुर– ३ कै रामचन्द्र न्यौपाने चुनाव गराए पनि, मत गने पनि छिटो निर्णय लिन सरोकारवाला निकायको ध्यानाकर्षण गराउँछन् । “छिटो निर्णय नलिने हो भने सबैको कमजोरी देखिन्छ,” भरतपुरलाई अनिर्णयको बन्दी नबनाउन उनले अनुरोध गरे ।

वडा नम्बर ३ कै राधा रेग्मीले भरतपुर महानगरको छिनोफानो नहुनु राज्यको अकर्मण्यताको विषय भएको बताइन् । पुल्चोकको सडक पेटीमा खेलौनाको व्यापार गर्ने उनी भन्छिन्, “चुनाव भयो भनेर कत्रो उत्साहले भोट हाल्न गएका थियौँ । नेताहरूले केही गर्लान् भन्ने लागेको थियो । तर, जनताले दिएको मत च्यातेर उल्टै जनताको अपमान पो गरिएछ !” उनले पनि निर्वाचन गर्ने हो कि मत गन्ने हो छिटो निर्णय लिन सुझाव दिइन् ।

भरतपुरकै राजेन्द्र पाण्डेको पनि त्यस्तै सुझाव छ । जनताको मतको समेत सुरक्षा गर्न नसक्नेले, सम्मान गर्न नसक्नेले जनताको कसरी रक्षा गर्छन् भन्ने प्रश्न उठेको उनको तर्क थियो ।

भरतपुर न्युरोडमा होटल सञ्चालन गर्दै आएका यज्ञपुरीका धनसिंह श्रेष्ठ पनि प्रमुख, उपप्रमुखको टुंगो नलगाइदिएर भरतपुरबासीको अपमान गरिएको जिकिर गर्छन् । “भरतपुरबासीलाई अपराधीसरह व्यवहार गरिएको छ । चुनाव भएको ठाउँमा सबैले जनप्रतिनिधि पाइसके, हामीले मेयर, उपमेयर पाउन सकेनौँ, हाम्रो के अपराध छ ?,” उनको प्रश्न थियो ।

त्यस्तै उनले अदालतले ६ गतेका लागि पेसी तोकेको भए पनि ६ गते पनि छिनोफानो नहुने जिकिर गरे । उनले भरतपुरलाई अनावश्यक राजनीतिको क्रिडास्थल बनाएको चुनावको सामान्य जितहारको विषयलाई राष्ट्रिय प्रतिष्ठाको विषय बनाइएको भन्दै दुःख व्यक्त गरे । “भरतपुर घटना लोकतन्त्रको कलंक हो, नेताहरू सचेत हुनुपर्छ,” उनको टिप्पणी थियो ।