भैरहवा । यही असार १४ गते हुन लागेको स्थानीय तहको दोस्रो चरणको चुनावका लागि उमेदवारी मनोनयन गर्न एक दिनमात्र बाँकी हुँदा रुपन्देहीमा चहलपहल बढेको छ । हालसम्म सिद्धार्थनगरमा नेपाली कांग्रेस, नेकपा एमाले, माओवादी केन्द्र र राप्रपाबीच प्रतिस्पर्धा हुने देखिएको छ । 

नेपाली कांग्रेस
नेपाली काँग्रेसका तर्फबाट सिद्धार्थनगरको मेयर पदका उमेदवार मातृकाप्रसाद यादव र उपमेयरकी उमेदवार माधवी शर्मा वाग्ले दिनहुँ घरदैलोमा छन् । ढिलो गरी उमेदवारी पाएका यी दुवैलाई घरदैलोमा भ्याई–नभ्याई छ । काँग्रेसका वडाअध्यक्षका उमेदवारहरूले पहिलो चरणको घरदैलो सम्पन्न गरे पनि मेयर उपमेयरले पहिलो चरणको घरदैलो गरिरहेका छन् । 

मेयर–उपमेयरका उम्मेदवारले वडा नं. १, २, ३, ४, ५, ६ र ८ को केही भागमा  घरदैलो अभियान सकेका छन् भने बाँकी वडामा क्रमशः घरदैलो गरीने नगर सचिव सञ्जीव शर्मा रेग्मीले बताए । 

नेकपा एमाले
पहिले नै मेयरमा हरिप्रसाद अधिकारी र उपमेयरमा उमा काफ्लेलाई उम्मेदवार बनाएको एमालेले पहिलो चरणको घरदैलो सकेको छ । प्रचार–प्रसारमा अन्य दलहरूभन्दा अगाडि देखिएको एमालेले संघसंस्था तथा सामाजिक अगुवाहरूसँग पनि अन्तरक्रिया गरिरहेको छ । घरदैलो सकीसकेको एमालेका उम्मेदवारहरुले अहिले आन्तरीक भेटघाटलाई केन्द्रीत छन् । 

राप्रपा
पहिले नै मेयर पदमा सागर प्रताप राणाको उम्मेदवारी घोषणा गरेको राप्रपाले पनि पहिलो चरणको घरदैलो अभियान सकेको छ । पहिलेदेखि मेयरमा पार्टीबाट एकल आकांक्षी रहेका उनी घोषणा पूर्व नै प्रचार प्रसारमा थिए । यसअघि एमालेसँगको गठबन्धनबाट मेयर पदमा जितेका राणा यसपटक बिना गठबन्धन उम्मेदवार छन् । उनी अहिले पनि घरदैलो र मतदाता भेटघाटमा छन् ।

माओवादी केन्द्र
माओवादी केन्द्रबाट मेयरमा फैज अहमद खाँन र उपमेयरमा कमला थापाले टिकट पाएसँगै प्रचार प्रसारलाई तिव्र पारेको छ । माओबादीले घरदैलोसँगै चोक चोकमा कोण सभाहरू गर्दै आफ्ना एजेण्डाहरू प्रस्तुत गरिरहेको छ । मओवादी उम्मेदवारहरु पनि अहिले घरदैलोमा छन् ।