काठमाडौं । अखिल नेपाल फुटबल संघ (एन्फा) का कर्मचारीहरू साढे दुई दशकदेखि सम्झौताविनै काम गरिरहेका छन् । फेडेरेसन अफ इन्टरनेसनल फुटबल एसोसियसन (फिफा) र एसियन फुटबल फेडेरेसन (एएफसी) ले पछिल्लो समय कर्मचारीको सम्झौता अनिवार्य गर्न भनेपछि यो समस्या बाहिरिएको हो ।

फिफा र एएफसीले अहिले कर्मचारीको सम्झौताविना तलब निकासा नगर्ने भनेपछि समस्या देखिएको बताइएको छ । एन्फाका वरिष्ठ पदाधिकारीले कर्मचारीको तलब रोक्का भएको स्वीकारेका छन् । ‘‘सम्झौता नभइ कर्मचारीहरूले तलब पाउँदैनन् । सम्झौता गर्न पुराना कर्मचारीले अवरोध सिर्जना गरेका छन्,’’ ती पदाधिकारीले भने, ‘‘स्थायी हुने प्रक्रिया हुन्छ । लोकसेवा आयोगबाट पास भएर आउनुपर्छ । चिठीका भरमा स्थायी हुँदैन । फेरि खेलकुद संघमा कहीं पनि स्थायी कर्मचारी भन्‍ने हुँदैन । पहिला कुनै निर्णय नगरी चिठीका भरमा कर्मचारी भर्ना गरिएको छ ।’’

सन् १९९० को दशकदेखि एन्फामा कर्मचारीलाई नियुक्ति दिएको पाइएको छ । जुन अहिलेसम्म पनि कार्यरत छन् । तर, साढे दुई दशकभन्दा लामो समय काम गरेका कर्मचारीलाई अहिलेसम्म स्थायी भएको अनुभूतिका साथ काम गरिरहेका थिए । तर, अहिले फिफा र एएफसीले सम्झौता अनिवार्य गर्न भनेपछि समस्या बल्झिएको हो ।

एन्फामा सबैभन्दा पुरानामध्येका एक प्रशासन विभाग प्रमुख गोकुल थापाले कर्मचारीले सम्झौतामा बखेडा झिकेको भन्‍ने कुरा यथार्थ नभएको बताएका छन् । ‘‘सम्झौताबारे छलफल भइरहेको छ । प्रक्रिया अगाडि बढेको हो । लकडाउनले गर्दा केही समस्या भएको पनि हो,’’ थापाले भने, ‘‘हाम्रो माग भनेको अफ टाइममा पनि कहिले-काहीं काम गर्नुपरिरहेको हुन्छ त्यसबारे सुनुवाइ होस् भन्‍ने हो ।’’

एन्फामा लामो समयदेखि पदाधिकारीहरूबीचको विवाद केही समययता मत्थर भएको देखिन्छ । तर, अहिले पुनः कर्मचारीको सम्झौतालाई लिएर एन्फा पदाधिकारी र कर्मचारीबीचको सम्बन्धमा खटपट सुरु भएको छ । एन्फाले कर्मचारी नियमावली बनाए पनि कार्यान्वयनमा आउन सकेको छैन । नियमावली बनाए पनि अहिले त्यसको कार्यान्वयमा जाने क्रममा समस्या उत्पन्‍न भएको बताइएको छ ।

यता, एन्फा महासचिव इन्द्रमान तुलाधर भने कर्मचारीको पक्षमा देखिएका छन् । अहिलेसम्म कर्मचारीसँग कुनै विवाद नभएको स्पष्ट पारे । ‘‘त्यस्तो होइन । सम्झौता साउनदेखि लागु हुने हो । सबै कुरा असारसम्मको क्लियर छ । अहिले लकडाउनले गर्दा समस्या भएको हो,’’ महासचिव तुलाधरले भने ।

महासचिवले यस्तो भनिरहँला बाह्रखरीसँग ती पदाधिकारीले भने महासचिव तुलाधर आफैं पनि कर्मचारीको सम्झौता कार्यान्वयनमा लैजाने कुरामा ढिला गरिरहेको आरोप लगाएका छन् । महासचिवले लकडाउनले गर्दा समस्या भएको बताए पनि कर्मचारीहरूसँग सम्झौता गर्ने निर्णय माघ अन्तिम साता बसेको कार्यसमिति बैठकले गरेको थियो । यसको जिम्मेवारी महासचिव तुलाधरले नै पाएको ती पदाधिकारी बताउँछन् ।

‘‘यो कामको जिम्मेवारी महासचिव इन्द्रमान तुलाधरलाई दिइएको हो । तर, अहिलेसम्म त्यो काम हुन सकेको छैन,’’ उनले भने, ‘‘कर्मचारीहरूले आफ्नो तलबको २ सय प्रतिशत बढाउन माग गरिरहेका छन् । त्यो सम्भव नभएको भन्दै प्रस्तावै रोकिएको छ ।’’

कर्मचारीहरूले आफ्नो तलबको कुरा गरे पनि खेलाडीबारे केही बोलेका छैनन् । तर, खेलाडीदेखि सबैको तलब बढाउनुपर्ने ती कर्मचारी बताउँछन् । त्यसले आर्थिक भार बढाउने हुँदा तत्काललाई रोक्ने निर्णय भएको उनको भनाइ छ ।

अध्यक्ष कर्माछिरिङ शेर्पाले भने कर्मचारीहरूको तलब बढाउने प्रस्ताव केन्द्रीय कार्यसमितिले पारित गरे आफूले त्यसमा समर्थन गर्ने बताएको स्रोतले भनेको छ ।

यस्तै, एन्फा प्रवक्ता किरण राईले कर्मचारीहरूले समस्या सिर्जना गरेको भन्दा पनि केही कुराहरूमा उनीहरूको असन्तुष्टि रहेको बताएका छन् । ‘‘कर्मचारीको केही माग र लकडाउनले गर्दा सम्झौता प्रक्रिया अघि बढ्न सकेको छैन,’’ उनले भने ।