काठमाडौं । मानिसलाई मिहिनेत र पूर्ण आत्मविश्वासले सफल बनाउँछ । यो एउटा आयाम पनि हो । कुनै लक्ष्य लिएपछि मानिसलाई सफल बनाउने आत्मविश्वास पनि चाहिन्छ । १३औं सागमा करातेका स्वर्णधारी खेलाडी लक्ष्मण तामाङलाई यो सबैले साथ दिएको छ । सुरुमा उनी आत्मरक्षाका लागि कराते खेल्न थाले । 

पारिवारिक माहोल पनि करातेमय रहेपछि उनले ५ वर्षको उमेरदेखि नै यसतर्फ लगाव बढाए । उनको बुबाको करातेप्रतिको रुचिले गर्दा लक्ष्मण पनि खेलमा लाग्न प्रेरित बने । उनले सातौं राष्ट्रिय खेलकुद प्रतियोगिताबाट राष्ट्रिय खेल खेल्ने अवसर पाए । त्यसअघि उनले विभिन्न घरेलु प्रतियोगितामा सहभागिता जनाइसकेका थिए । 

उनको आत्मविश्वासकै कारण घरेलु मैदानमा सम्पन्न १३औं दक्षिण एसियाली खेलकुद प्रतियोगिता (साग) मा स्वर्ण पदक दिलाउन सफल भए । “सानैदेखि करातेमा लागें । मैले ठूलै सफलता हात पार्छु भन्ने सोचले भने खेलेको थिएनँ । पारिवारिक माहोल पनि करातेमय भयो,” उनले भने, “अरूले खेलेको देखेरै मलाई पनि रुचि जाग्यो । अहिले आफूले छनोट गरेको बाटो सही लाग्दै छ ।”

रामेछापमा जन्मिएका लक्ष्मण काठमाडौंमा हुर्किए । उनलाई कराते कसरी सिक्ने र कसरी अघि बढ्ने भन्ने चिन्ता भने थिएन । तर, उनलाई करातेमा भविष्य छ या छैन भन्ने कुराले भने सधैं सताइरह्यो । सातौं राष्ट्रिय खेलकुद प्रतियोगितापछि उनले पछि फर्केर हेर्नुपरेन । विभागीय टोली एपीएफमा आबद्ध भएसँगै राष्ट्रिय खेलकुद प्रतियोगितामा स्थान पाएका उनलाई खेलमै भविष्य छ भन्ने लाग्यो ।

सागमा स्वर्ण जित्दाको क्षण भने लक्ष्मणका लागि ऐतिहासिक छ । पहिलोपटक सागमा सहभागिता जनाएका उनले सफल हुने मौका पाए । यो सफलतालाई आत्मसात् गर्दै उनले अबका खेलहरूमा थप अब्बल बनाउने योजना पनि बनाएका छन् । उनी आठौं राष्ट्रिय खेलकुदमा तेस्रो हुँदा पनि सागमा सफलता पाउन सफल रहे । 

“पहिलो साग मेरा लागि ऐतिहासिक भयो । आठौं राष्ट्रिय खेलकुदमा तेस्रो भएको म सागमा स्वर्ण जित्नुपर्ने दबाब थियो । लामो समयको खेल जीवन सफल बनाउन पनि स्वर्ण पदक आवश्यक थियो । स्वर्ण जितेरै सफलता हात पर्छ भन्ने मानसिकतामै सागबाट सफलता मिल्यो,” लक्ष्मण भन्छन्, “अब यो सफलतालाई आत्मसात् गर्ने योजनामा छु ।”