गजल–१
पत्थरले नै चोट खायो फूलमा कति धार होला 
मल्हम आफ‌ैं दुख्न थाल्यो केले उपचार होला ।
दिलको साँचो त्यतै थियो खोलेनछ ढुकुटी चैं
दिल चोर्ने चोर पनि कति इमानदार होला ।

हीरा हीरा ठोक्किएर फुटेछन् रे अँध्यारोमा
हेर कालो धनभित्र कति अन्धकार होला ।

जन्मेको त एकपटक हो यौटै छ यो जिन्दगानी
जिन्दगीमा मर्नुपर्ने किन बारबार होला ।

मैले हेर्छु उसलाई अनि यो तस्बिरले मलाई हेर्छ
ठ्याक्कै मेरो जस्तो देख्छु कसको अनुहार होला ।

० ० ०

गजल–२

निकै ठूलो खबर पायौं, खबर गरेको मजा आयो ।
तिमी आयौ मलामी भै, र पो मरेको मजा आयो । 

फुलेका छन् बगैंचाका, हरेक कलीमा मुहार तिम्रो
कुनै बेला खडेरीमा, यो दिल छरेको मजा आयो ।

तिम्रो शिरमा पुगिएन, पटक–पटक म फुल्दा पनि
कोमल पाउले छोयो आज, भुइँ झरेको मजा आयो ।

धेरै चम्के म भित्रका, घमण्डका यी शिशाहरू
सयौं टुक्रा भई आज, भुइँ झरेको मजा आयो ।

ए जिन्दगी माया नगर, कत्ति आएन मजा मलाई
जिन्दगीले सधैं मलाई, आँखा तरेको मजा आयो ।