एजेन्सी । अभिनेत्री आलिया भट्टले मोसन पिक्चर अफ आर्टस एन्ड साइन्सेस एकेडेमीको सदस्य बन्न आमन्त्रित गरेकोमा आभार व्यक्त गरेकी छन् । उनले बिहीबार इन्स्टाग्राममा ओस्करलाई धन्यवाद दिँदै यो निम्तो पाएकोमा खुसी व्यक्त गरिन् ।
धन्यवाद दिँदै लेखेकी छिन्, “मलाई सदस्यताका लागि आमन्त्रित गरेकोमा म ‘द एकेडेमी अफ मोसन पिक्चर आर्टस एन्ड साइन्सेस’ लाई धन्यवाद दिन चाहन्छु । यो निम्तो पाउँदा म सम्मानित भएको महसुुस गरिरहेको छु ।”
साथै उनले भारतीय चलचित्रले विश्व मञ्चमा अन्यन्तै योग्य प्लेटफर्म पाइरहेको देख्दा गहिरो सन्तुष्टि प्राप्त भइरहेको पनि उल्लेख गरेकी छन् । चलचित्रले फरक वर्ग, जाति र भूगोलका मानिसलाई एकै थलोमा ल्याउन सक्ने एक राम्रो माध्यम भएको पनि आलियाले बताएकी छन् ।
एकेडेमीको लक्ष्य मध्येको विविधता कायम गर्ने उद्देश्यका साथ एकेडेमीले विगत केही वर्षदेखि नयाँ सदस्यहरू आमन्त्रण गर्दै आइरहेको छ । यही सिलसिलामा यो वर्ष बलिउडबाट आलिया र ऋतिकलाई आमन्त्रण गरेको हो ।
भारतबाट ऋतिक र आलियाका अलावा कास्टिङ निर्देशक नन्दिनी श्रीकान्त र टेस जोसेफ, पहिरन डिजाइनर निता लुल्ला, वृत्तचित्र फिल्म निर्माता निष्ठा जैन र अमित मधेसिया, भिजुअल इफेक्ट सुपरभाइजर विशाल आनन्द र सन्दीप कमल र फिल्म स्कोर कम्पोजर नन्दिता देसाई पनि आमन्त्रित छन् ।
उनीहरूलाई वर्ष २०२१ को अप्रिलमा हुने ९३ औं ओस्कर अवार्ड समारोहमा सम्मिलत हुन आमन्त्रण गरिएको हो । ९ हजार सदस्य रहेको एकेडेमीले यो वर्षमात्रै थप ८१९ नयाँ सदस्यलाई सहभागिताका लागि आमन्त्रण गरेको छ ।
(इन्डियन एक्सप्रेस)