काठमाडौं । विश्वभर फैलिएको कोरोना भाइरसका कारण हाल विश्व खेलकुद जगत नै ठप्प छ । जसले गर्दा कुनै पनि खेलकुद प्रतियोगिताले अहिले पूर्णता पाउन सकेका छैनन् । खेल प्रतियोगिताहरू आयोजना हुन सक्ने अवस्था नभए पनि खेलाडीहरूले भने जसो–तसो भए पनि सेल्फ प्रशिक्षण गरिरहेका छन् । उसो त सबै खलाडीले सही स्थानमा प्रशिक्षण गर्ने मौका भने पाएका छैनन् । 

खेलाडीहरूले सही स्थानमा प्रशिक्षण गर्न नपाउँदा आफ्नो प्रदर्शनमा गिरावट आउन सक्ने चिन्ता व्यक्त गर्दै आएका छन् । त्यसैले सबै खेलाडीहरू यतिबेला महामारीको अन्त्य चाँडैहोस् भन्ने कामना गरिहेका छन् । उनीहरूले छिट्टै प्रशिक्षणमा फर्किंदै प्रतियोगिता होस् भन्ने आशा गरेका छन् ।  

हाल धेरै जसो खेलाडीहरू बन्द कोठाभित्रै सेल्फ प्रशिक्षणमा छन् । उनीहरू आफ्नो प्रदर्शनलाई लयमै राख्नका लागि भए पनि दैनिक शारीरिक व्यायाम गरिरहेका छन् । यता केही विभागीय खेलाडी भने आफ्नै मैदानमा प्रशिक्षण गरिरहेका छन् । यस्तै मध्येका एक हुन्, नेपाली राष्ट्रिय क्रिकेट टोलीका खेलाडी अविनाश बोहोरा । उनी लकडाउनको समयमा पनि घर नजिकै रहेको कीर्तिपुरस्थित त्रिवि क्रिकेट मैदानमा प्रशिक्षण गरिरहेका छन् । 

लक डाउन अघि पनि आफ्नो प्रशिक्षणमा ध्यान दिने उनी, चैत ११ गतेदेखि नेपालमा भएको लक डाउनको समय सदुपयोग गर्दै प्रशिक्षणमा जुटेका छन् । उनी अहिले आफ्नो फिटनेसमा धेरै चासो दिरहेका छन् । 

“मैले लकडाउनको समयमा पनि आफ्नो प्रशिक्षणलाई रोकेको छैन । यो समयमा आफूले फिटनेसमा ध्यान दिन सकिएन भने प्रदर्शनमा केही असर पर्नसक्छ जस्तो लाग्छ । त्यसैले यो समयलाई पनि सदुपयोग गर्दै म प्रशिक्षणमा जुटेको छु । यसले मेरो फिटनेसमा धेरै फाइदा पुग्छ जस्तो लाग्छ,” अविनाशले बाह्रखरीसँगको कुराकानीमा भने । 

नेपाली क्रिकेट पनि हाल कोरोनाका कारण सुनसान छ । नेपालमा हुने एभरेस्ट प्रिमियर लिग (ईपीएल) लगायत अन्य घरेलु लिगहरू अहिले स्थगित छन् । त्यस्तै नेपाली टोलीले खेल्ने अन्तर्राष्ट्रिय क्रिकेट प्रतियोगिताहरू पनि स्थगित भएका छन् । यसै कारण खेलाडीहरूलाई आफ्नो स्वास्थ्यमा ध्यान राख्नु पर्ने अवश्यक छ । 

“प्रतियोगिताहरू भएको भए त्यसैमा व्यस्त हुनेथियौं । अहिले कुनै पनि प्रतियोगिता छैनन् । त्यसले खेलाडीको प्रदर्शनमा केही कमजोरी हुन्छ कि भन्ने हो । मेरो कुरामा त्यस्तै छैन । मैले मैदानमा आफ्नो शत प्रतिशत दिन्छु । यो बीचको तयारीले पनि केही फाइदा भने मिल्नेछ । अब लकडाउन पछिको प्रदर्शनको पर्खाइमा छु,” अविनाशले भने । 

उमेर समूहमा प्रतिस्पर्धा नगरी सिधै राष्ट्रिय टोलीमा स्थान बनाएका अविनाश पछिल्लो समय राष्ट्रिय टोलीका लागि उत्कृष्ट प्रदर्शन गर्ने खेलाडीमा पर्छन् । उनले युएईविरुद्धको टि–ट्वान्टी सिरिजमा ३१ जनावरी २०१९ मा डेब्यु गरेका थिए । उनी डेब्यु खेलमा नै ‘प्लेअर अफ टी सिरिज’ घोषित भएका थिए । 

“मेरो प्रदर्शनलाई निरन्तर सुधार गर्दै गइरहको छु । मेरो अन्तिम चाहना भनेको देशका लागि विश्वकप खेलेर जिताउनु हो । त्यसका लागि नै आजैदेखि लागि परेको छु । हामीले  निरन्तरको प्रदर्शनलाई सुधार गर्दै गएमा उत्कृष्ट प्रदर्शन गर्दै विश्वकप जिताउने कुरामा दुई मत छैन,” अविनाशले भने ।