न्युयोर्क । संयुक्त राज्य अमेरिकामा न्युयोर्क राज्यमा मात्र विश्‍वका अन्य मुलुकहरुभन्दा बढी कोरोना संक्रमित फेला परेका छन् । न्युयोर्कमा मात्र पछिल्लो २४ घण्टामा १० हजार कोरोना संक्रमित थपिएका छन् । 

न्युयोर्कमा बिहीबारसम्म कोरोना संक्रमितको संख्या एक लाख ५९ हजार ९३७ पुगेको  छ । यता स्पेनमा कोरोना संक्रमितको संख्या एक लाख ५३ हजार छ भने इटालीमा एक लाख ४३ हजार कोरोना संक्रमित छन् । 

कोरोना भाइरसको उद्‌गम चीनमा भने कोरोना संक्रमितको संख्या ८२ हजार पुगेको छ । 

अमेरिकाभर कोरोना संक्रमितको संख्‍या चार लाख ६२ हजार पुगेको छ भने १६ हजार ५०० को मृत्यु भएको छ । विश्वभर भने १६ लाख कोरोना संक्रमित छन् भने ९५ हवारभन्दा बढीको मृत्यु भइसकेको छ । 

विश्वभरका अन्य मुलुकका कोरोना संक्रमितको संख्याभन्दा न्युयोर्क अगाडि छ । यसभन्दा सात हजार कम कोरोना संक्रमित स्पेनमा छन् भने १८ हजार कम इटालीमा छन् । 

न्युयोर्कमा कोरोना संक्रमणबाट मृत्यु भएकाहरुलाई सामूहिक चिहानमा गाडिरहेको तस्बिरहरु सार्वजनिक भएका छन् । ठूलो खाडल खनेर सिँढी लगाएरमा मानिसहरुलाई एकै खाडलमा गाडिरहेका तस्बिरहरु ड्रोनले खिचिएको बताइएको छ । उक्त तस्बिरहरु हार्त टापुको भएको जनाइएको छ । 

न्युयोर्कमा बुधबारमात्र ७९९ जनाको मृत्यु भएको जनाइएको छ । जुन पछिल्लो तीन दिनकै उच्च रेकर्ड हो । 

राष्ट्रपति डोनाल्ड ट्रम्पले गठन गरेको कोरोना भाइरस टास्क फोर्सका संयोजक डा. एन्थोनी फाउकीले बिहीबार अमेरिकामा कोरोना संक्रमणबाट ६० हजारको मृत्यु हुनसक्ने बताएका छन् । उनले यसअघि मृत्यु हुनेको संख्या अमेरिकामा मात्र एकदेखि दुई लाख हुने बताएका थिए । -बीबीसी