काठमाडौं । नेपालले ‘एएफसी एसियन कप’ छनोट प्रतियोगिता खेलिरहेको छ । होम एण्ड अवेका आधारमा चल्ने छनोटअन्तर्गत नेपालले पहिलो खेल फिलिपिन्ससँग खेलिसकेको छ । 

छनोटअन्तर्गत अब नेपालले दोस्रो खेलमा आगामी जुन १३ मा यमनसँग घरेलु भूमिमा खेल्ने तालिका छ । तर, नेपालले यमनसँगको होम गेम कुन रंगशालामा खेलाउने सम्बन्धित निकायले उत्तर दिन सक्दैनन् । किनकी नेपालसँग अन्तर्राष्ट्रिय स्तरको खेल खेलाउने कुनै पनि रंगशाला छैन । 

त्रिपुरेश्वरमा रहेको एकमात्र अन्तर्राष्ट्रिय रंगशाला २०७२ साल वैशाखमा गएको भूकम्पका कारण खेल्न योग्य छैन । उक्त रंगशालाको पुनः निर्माण सकिएको छैन । यस्तोमा भूकम्पपछि सरकार र अखिल नेपाल फुटबल संघ (एन्फा) ले दशरथ रंगशालाको वैकल्पिक रंगशालाको रूपमा ललितपुरको च्यासलमा रहेको एन्फा टेक्निकल सेन्टरलाई स्तरोन्नति गर्दै अन्तर्राष्ट्रिय स्तरको रंगशाला बनाउने घोषणा गरेको थियो । तर, दुई वर्षअघि नै निर्माण कार्य सम्पन्न गर्ने भनिएको उक्त फुटबल मैदानको निर्माणकार्य अझै थालनी भएको छैन । 

“दशरथ रंगशालाको विकल्पको रूपमा हामीले च्यासल मैदानलाई रंगशाला बनाउने प्रक्रिया अगाडि बढाएका थियौं,” एन्फाका प्रमुख कार्यकारी अधिकृत इन्द्रमान तुलाधरले भने, “तर, विविध कारणले निर्माण सुरु ढिला भएको छ । अब चाँडै काम सुरु हुन्छ ।” युवा तथा खेलकुद मन्त्रालय, राष्ट्रिय खेलकुद परिषद् (राखेप) र एन्फाबीच च्यासललाई रंगशाला बनाउने त्रिपक्षीय सम्झौता भए पनि लामो सरकारी प्रक्रियाको कारण च्यासल मैदान निर्माण कार्य ढिला भएको एन्फाले जनाएको छ । तर, एन्फाले रंगशालाको निर्माण कार्य यो महिनाबाट सुरु हुने बताएको छ ।

“सरकारी प्रक्रियाको कारण ढिला भएको हो, अब चाँडै सुरु गर्दै छौं,” प्रमुख कार्यकारी अधिकृत तुलाधरले थपे, “रंगशाला बनाउने प्रक्रिया अब रोकिने छैन । सरकारले सुरुवाती टेन्डरको प्रक्रिया अघि बढाएको छ । एक महिनाबाट पहिलो चरणका लागि टेन्डर आह्वान भैसकेको छ ।”  उनका अनुसार रंगशाला बनाउन अन्तिम चरणमा ६ वटा कम्पनी छनोट गरिने छ । यस्तै तुलाधरले अब च्यासल मैदान सन् २०१८ मा नेपालमा आयोजना हुने १३ औं दक्षिण एसियाली खेलकुद (साग) खेलकुदसम्म खेल्न योग्य हुनेगरी काम अघि बढाउने तयारी भएको बताए । 

च्यासल रंगशाला ‘एस्ट्रो टर्फ र फ्लड लाइट’ सहित १८ महिनाभित्र बनाउने गरी २०७२ भदौ १० गते तत्कालीन युवा तथा खेलकुद मन्त्री पुरुषोत्तम पौडेलको रोहवरमा राष्ट्रिय खेलकुद परिषद् (राखेप) का सदस्यसचिव केशवकुमार विष्ट र तत्कालीन एन्फा अध्यक्ष गणेश थापाले सम्झौतापत्रमा हस्ताक्षर गरेका थिए । सम्झौतापत्रमा च्यासल मैदानलाई १० देखि १५ हजार दर्शक क्षमताको रंगशाला बनाउने बताइएको थियो । यसको लागि माटोको परीक्षण सकिइसकेको पनि एन्फाले जनाएको थियो । 

करिब ३५ करोडको लागत खर्च अनुमान गरिएको च्यासल रंगशाला बनाउन सरकारले सार्वजनिक गरेको आर्थिक वर्ष २०७२–७३ को बजेटमा ४ करोड रुपैयाँ बजेट विनियोजन समेत गरिसकेको थियो । यस्तै फिफाले गोल प्रोजेक्टअन्तर्गत च्यासल रंगशाला निर्माणका लागि ६ लाख अमेरिकी डलर सहयोग गर्ने सम्झौतामा बताइएको थियो । त्यसबाहेक फिफाले च्यासलमा ‘आर्टिफिसियल टर्फ’ राख्नतर्फ उपलब्ध गराउने छ । 

तर, च्यासल रंगशाला बनाउन युवा तथा खेलकुद मन्त्रालय र अर्थ मन्त्रालयबीच ‘मल्टी इयर बजेट’ मा सहमति हुन ढिलाइ भएकोले निर्माण कार्य ढिला सुरु भएको युवा तथा खेलकुद मन्त्रालयले जनाएको छ । मन्त्रालयका सहसचिव तथा प्रवक्ता राम प्रसाद थपलियाले अब भने रंगशाला निर्माण प्रक्रियाको लागि सम्पूर्ण सरकारी प्रक्रिया पूरा भइसकेको र चाडै निर्माण सुरु हुने जानकारी दिए । 

“रंगशाला बनाउने प्रक्रिया सकिएको छ । अब निर्माण कार्य चाँडै सुरु हुन्छ,” थपलियाले भने, “मन्त्रालयले रंगशाला निर्माणका लागि बजेट उपलब्ध गराइसकेको छ, मन्त्रालय मातहतको खेलकुद विकास परिषद्ले काम अघि बढाइसकेको छ ।” थपलियाले रंगशालाका निर्माणका लागि बजेट अपुग भए सरकारले चाँडै निकासा गरिदिने समेत बताए । यस्तै उनले रंगशाला निर्माण कार्यको पछिल्लो अवस्था र निर्माण कार्य चाँडो गर्न मन्त्रलयले निर्देशन समेत दिइसकेको बताए ।

ललितपुर उपमहानगरपालिकासँग २५ वर्ष लिजमा लिएर एन्फाले च्यासल मैदानमा ‘बी’ र ‘सी’ डिभिजन लिग तथा अन्तर्राष्ट्रियस्तरको प्रतियोगितामा सहभागी टोलीको प्रशिक्षण लगायतका कार्य गर्दै आएको छ ।