काठमाडौं । ठगी अभियोगमा पक्राउ परेका व्यवसायी रुपज्योति कंसाकारले आफूविरुद्ध षड्यन्त्र भएको  बताएका छन् । उनले आइतबार काठमाडौं जिल्ला अदालतमा आफू निर्दोष रहेको जिकिर गरेका हुन् । 

प्रहरीले गत बिहिबार विमानस्थलबाटै पक्राउ गरेका कंसाकारलाई दोस्रोपटक म्याद थपका लागि अदालत ल्याएको थियो । न्यायाधीश ओमप्रसाद अर्यालको इजलाशले थप अनुसन्धानका लागि ५ दिन हिरासतमा राख्न प्रहरीलाई अनुमति दिएको छ । 

सो क्रममा उनले आफूलाई हिरासतमा राख्नुपर्ने कुनै कारण नभएको भन्दै आफूलाई साधारण तारेखमा छाड्नुपर्ने जिकिर गरे । “मलाई कुन अभियोगमा हिरासतमा राखियो ?” ज्योतिले पटकपटक कारण सोधे ।

न्यायाधीश अर्यालले ज्योतिको प्रश्नको जवाफ अदालतले दिनुपर्ने कारण नभएको भन्दै अदालतले जवाफ लिखितमा दिने बताए । अहिलेसम्म मुद्दा नै अदालतमा दर्ता नभएकाले अनुसन्धान अधिकारीसमक्ष बयानमा आफ्नो कुरा भन्न ज्योतिलाई सुझाव दिएपछि ज्योतिले आफूलाई कानुनी कुरा थाहा नभएको भन्दै भूल सुधार गरेका थिए । 

पक्राउ पुर्जी जारी भएको थाहा पाउँदा पाउँदै आफू नेपाल आएको, आफूमाथिको अभियोगसँग सम्बन्धित प्रमाण समेत नष्ट गर्ने सम्भावना नरहेको र देश छोडेर भाग्ने पनि नभएकाले आफूलाई हिरासतमा राख्नुपर्ने अवस्था नभएको उनको जिकिर थियो । ज्योति परिवारको इज्जतमा बलात्कार भएको दुखेसो पनि उनले पोखे । 

त्यस्तै, उनले आफू संलग्नै नभएको कम्पनीको कारोबारमा ज्योति परिवारका ११ जनाविरुद्द उजुरी दिएको भन्दै उजुरीकै आधारमा हिरासतमा राख्ने हो भने भोलि अरु व्यवसायीमाथि पनि यस्तो हुनसक्ने बताए । “श्रीमान् ! ज्योति परिवारको इज्जतमा बलात्कार गर्न खोजिएको छ । मलाई हिरासतमा राख्नुपर्ने कारण छैन,” उनले भने । आफूले ठगेको भनेको रकम अदालतमा जम्मा गरिसकेकाले ठगी गरेको भन्ने आधार पनि नभएको उनको दाबी थियो । ज्योतिलाई महानगरीय प्रहरी परिसर काठमाडौंमा राखिएको छ । तर, उनकी छोरी सुरुची भने उपचारका लागि अस्पताल भर्ना भएकी छन् ।  

रुपज्योतिले आफूसँग विवाद मिलाउन भन्दै ५ करोड मागिएको पनि इजलाशसमक्ष बताए । प्रहरीले ज्योतिको कल डिटेल हेर्नुपर्ने, ठगी गरेको कम्पनीको आधिकारिक दस्तावेज लगायतबारे थप अनुसन्धान गर्नुपर्ने भन्दै दोस्रो पटक म्याद थपका लागि अनुमति मागेको थियो । जिल्ला न्यायाधीश अर्यालले मुद्दा अदालतमा नआइसकेकाले ज्योतिको बयानकै आधारमा अदालतले आदेश गर्न नमिल्ने, ज्योतिले आफ्ना कुरा बयानका क्रममा अनुसन्धान अधिकारीसमक्ष राख्न्ुपर्ने फौजदारी न्यायको सिद्धान्त स्मरण गराएका थिए । न्यायाधीश अर्यालले थप ५ दिन अनुसन्धानका लागि प्रहरीलाई अनुमति दिएका छन् । 

जिल्ला अदालत काठमाडौंले ०७५ मंसिर २० गते ज्योतिको नाममा पक्राउ पुर्जी जारी गर्न अनुमति दिएको थियो । त्यसपछि मंसिर २५ गते जिल्ला अदालतले जारी गरेको पुर्जी खारेजको माग गर्दै ज्योति सर्वोच्च अदालत गएका थिए । कात्तिक २८ गते प्रधानन्यायाधीश चोलेन्द्र शमशेर राणाको इजलाशले ज्योतिको सो रिट खारेज गरेको थियो । 

काठमाडौं महानगरपालिका–३ बाँसबारीस्थित ल्यान्डमार्क डेभलपर्स प्रालि र विजेन्द्रकृष्ण मल्लबीच २०७१ सालमा घर निर्माणसम्बन्धी सम्झौता भएको थियो । सम्झौतामा ६ आना ३ दाम २.१६ पैसाको जग्गामा घर बनाएर मल्ललाई हस्तान्तरण गर्ने सहमति थियो । सम्झौताबमोजिम मल्लले ल्यान्डमार्कलाई अग्रिम एक करोड ३६ लाख रुपैयाँ दिएका थिए ।

घर बनाएर हस्तान्तरण गर्दा मल्लले २ करोड १४ लाख १९ हजार ७५० रुपैयाँ बुझाउनुपर्ने सम्झौतामा थियो । तर, सो जग्गामा घर नबनाई एक करोड ३६ लाख रुपैयाँ ठगी गरेको उजुरी छ ।