चितवन । भारतले आफ्नो नयाँ नक्सामा नेपालको कालापानी र लिपुलेकलाई समावेश गरेको विरोधमा देशभर विरोध भइरहेको बेला चितवनमा पनि बिहीबार प्रदर्शन गरिएको छ । 

नेकपा क्रान्तिकारी माओवादीको भ्रातृ संस्था देशभक्त जनगणतान्त्रिक मोर्चा नेपाल, जिल्ला समिति चितवनले नेपाली भू-भाग अतिक्रमण गरेको भन्दै बिहीबार दिउँसो नारायणगढको  पुलचोकमा विरोध प्रर्दशन गरेको हो ।

पुल्चोकबाट निस्किएको र्‍याली लायन्सचोकमा आएर समापन भएको थियो । प्रदर्शनकारीले 'लिपुलेक हाम्रो हो', 'भारतीय विस्तारवाद कालापानी छोड', 'दलाल संसदीय व्यवस्था मुर्दावाद', 'नरेन्द्र मोदी मुर्दावाद', 'ओली सरकार मुर्दावाद' भन्दै नारा लगाएका थिए । प्लाकार्डमा 'सम्पूर्ण नेपाली नागरिक एक हौँ', '१९५० लगायतका सम्पूर्ण असमान सन्धी सम्झौता खारेज गर' लगायतका नारा लेखिएका थिए । 

सो क्रममा बोल्दै मोर्चाका अध्यक्ष बाबुराम प्यासी परियारले भारतले नक्सा नसच्चाएसम्म प्रदर्शनलाई जारी राखिने बताए । भारतको विस्तारवादी नीतिको विरोध गर्दै उनीहरुले नेपालको भू-भाग भारतीय तत्काल नक्साबाट हटाउन माग गरेका छन् । नेकपा निकट विद्यार्थी संगठनले पनि यसको चर्को विरोध गर्दै विहान प्रदर्शन गरेको थियो प्रदर्शन पश्चात चौबीसकौठीमा कोणसभामा परिणत भएको थियो । 

कोणसभामा सम्बोधन गर्दै विद्यार्थी नेता अशोक देवकोटाले भारतले विगतदेखिको हेपाहा प्रवृत्ति फेरि दोहोर्‍याएकाले राष्ट्रियता संरक्षणका लागि सडकमा उत्रिनु परेको बताए । 

उनले आजको कार्यक्रम सांकेतिक रुपमा रहेको र सरकारले समस्या समाधानका लागी प्रभावकारी भूमिका नखेले भारतविरुद्धको आन्दोलन देशव्यापी रुपमा चर्काउने चेतावनी पनि दिए ।