चितवन । महानगरलाई समृद्ध र सुसंस्कृत बनाउने उद्देश्यसहित भरतपुर महानगरले सहयोगापेक्षी सडकमानवमुक्त महानगर बनाउने तयारी गरेको छ । यसका लागि बिहीबार महानगरले भरतपुरमा पत्रकार सम्मेलन गरी सबै तयारी पूरा गरेको जानकारी दिएको हो । यसका लागि सामाजिक संस्था मानवसेवा आश्रमसँग समन्वय गरी अगाडि बढ्ने बताइएको छ । 

पत्रकार सम्मेलनमा बोल्दै भरतपुर महानगरपालिकाकी प्रमुख रेणु दाहालले महानगरलाई सुसंस्कृत र व्यवस्थित बनाउने उद्देश्यसहित यही कात्तिक ९ गते सहयोगापेक्षी मानवमुक्त महानगर घोषणा गर्न लागिएको जानकारी दिइन् । भरतपुर महानगरपालिकाको नीति तथा कार्यक्रम अर्न्तगत महानगरलाई सहयोगापेक्षी सडकमानवमुक्त महानगर घोषणा गर्न लागिएको हो ।

भोलिका दिनहरुमा यसको व्यवस्थापन गर्न निरन्तरता दिनको लागि सूचक निर्धारण गरिएको छ । प्रमुख जिल्ला अधिकारीको संयोजकत्वमा पाँच सदस्यीय अनुगमन तथा मुल्यांकन समिति निर्माण भई घोषणाको तयार पूरा जनाइएको छ । 

घोषणालाई सार्थकता दिन चुनौती रहेको भन्दै महानगर प्रमुख दाहालले यसलाई दिगो व्यवस्थापन गर्ने लक्ष्यसहित महानगर अघि बढ्ने बताइन् । सो अवसरमा बोल्दै महानगरका प्रमुख प्रशासकीय अधिकृत नेत्रप्रसाद सुवेदीले भरतपुर देशकै केन्द्र रहेको र यहाँका सडक विभिन्न थरीका मानवको आश्रयस्थल रहेकोले सुरक्षा संयन्त्रको सहयोगमा रात्रिकालिन सडक सेवालाई निरन्तरता दिने बताए । उनका अनुसार सडक मानवको प्रकृति र परिस्थिति हेरी उनीहरुलाई परामर्श गरी रोजगारीका अवसर तथा काम नै गर्न नसक्नेलाई उद्धार गरी आश्रम, धर्मशाला  तथा पुनर्स्थापना केन्द्रमा संरक्षण दिइनेछ । 

सो अवसरमा बोल्दै मानवसेवा आश्रमका केन्द्रीय अध्यक्ष रामजी अधिकारीले भरतपुरमा रहेको आश्रमले स्थापना कालदेखि सहयोगापेक्षी सडक मानवको उद्धार गरेको बताउँदै घोषणालाई सार्थक बनाउन स्थानीय सरकारको भूमिका महत्वपूर्ण रहने बताए । हालसम्म दाताहरुको सहयोगमा चल्दै आएको आश्रमका लागि महानगरले बजेट व्यवस्थापन गर्नुपर्ने उनको भनाई छ । 

घोषणाको लागि महानगरले असोज २७ देखि रात्रिकालिन उद्धार कार्यलाई सक्रिय पारेको छ । जसअनुसार यस अवधिमा २५० भन्दा बढी व्यक्तिलाई उद्धार गरी संरक्षण दिने, रोजगारी दिनेलगायत पारिवारिक पुर्नमिलन गर्ने काम भएको बताएको छ । महानगरले सडकमानव मुक्त घोषणा गर्ने तयारी गरेपनि महानगरको मातहतमा कुनै संरक्षणस्थल भने छैन । 
महानगरले आगामी दिनमा यसको लागि बजेट व्यवस्थापन लगायत अन्य रचनात्मक सहयोग गर्ने प्रतिबद्धता जनाएको छ । २०७१ सालमा भरतपुर वडा नम्बर १० रहेको मानवसेवा आश्रममा हालसम्म ५०० जनालाई उद्धार गरिएकामध्ये ३०० जनलाई पारिवारिक पुर्नमिलन गराइएको र उद्धार गरिएकामध्येबाट विभिन्न कारणले आश्रममै १०० जनाको मृत्यु भएको जनाएको छ । 

हाल उक्त आश्रममा १०० जना सडकमानव, बेसहारा, सहयोगापेक्षीहरुले संरक्षण प्राप्त गरेको आश्रमले जनाएको छ । देशभर ७ वटै प्रदेशमा र १४ जिल्लाका गरी १६ शाखामा  ८ सय ५० जना  सडकमानव सहयोगापेक्षी रहेका छन । आश्रमले २०८२ सालसम्म नेपाललाई सडकमानव सहयोगापेक्षीरहित देश बनाउने उद्देश्यले यो अभियान थालेको हो ।