चितवन । देशभर प्रकोपको रुपमा फैलिएको डेंगुको संक्रमण चितवनमा घट्दो क्रममा रहेको छ । जिल्लामा यसबारे सचेतना तीव्र पारिएको र मौसम समेत अनुकूल भएपछि अस्पतालमा कम बिरामी आउन थालेका हुन् । 

डेंगुको संक्रमण दर केही घटेको देखिए पनि वर्षा नरोकिएकाले त्रास कायम रहेको चिकित्सकहरु बताउँछन् । उनीहरुका अनुसार डेंगुको प्रकोप फैलने समय सेप्टेम्बरबाट हो । भरतपुर अस्पतालका मेडिकल विभाग प्रमुख डा. प्रकाश खतिवडा तापक्रम घटेसँगै डेंगुका बिरामी घटेको बताउँछन् । “२५ डिग्री तापक्रम भन्दा बढीमा मात्र यो बढी सक्रिय हुन्छ । तर कात्तिकको तेस्रो सातासम्म भने जोखिम नै छ,” उनले भने । उनका अनुसार हाल अस्पतालमा डेंगुका बिरामी घटेर डेढ सयको हाराहारीमा छन् । 

वरिष्ठ फिजिसियन डा. कालिदास अधिकारी संक्रमण दर घट्दै गए पनि डेंगुको जोखिम अझै रहेको बताउँछन् । “मौसम अनुसार यो रोगको संक्रमण भर पर्दछ । अझै केही समय जोखिम नै छ,” उनले भने । उनका अनुसार यसको न्यूनीकरणको लागि जनचेतना फैलाउने र वातावरण सफाईलाई निरन्तरता दिनुपर्छ । 

भरतपुर अस्पतालका सूचना अधिकारी लिलाधर पौडेलले भरतपुर अस्पतालमा भाइरल ज्वरोसँगै डेंगुका बिरामी घटेको बताए । उनका अनुसार अघिल्लो हप्ता अस्पतालमा आएका २ हजार २ सय बिरामीमध्ये १२ सय जना मेडिकल विभागमा आएकोमा ६०० जति भाइरल ज्वरो र डेंगुका थिए । अहिले यो संक्रमणदर ह्वात्तै घटेको छ । 

जिल्ला स्वास्थ्य कार्यालयको तथ्यांक अनुसार साउनयतादेखि गत शुक्रबारसम्म १० हजार ४२ जनामा डेंगु परीक्षण गरिएकोमा ३ हजार १सय ३८ जनामा डेंगु पोजिटिभ देखिएको छ । जसअनुसार सबैभन्दा बढी भरतपुर महानगरपालिकामा २ हजार ८४ जनामा डेंगुको संक्रमण देखिएको थियो भने सबैभन्दा कम इच्छाकामना गाउँपालिकामा १६ जनामा डेंगु संक्रमण देखिएको छ । गतवर्ष १ हजार ९ सय ५१ जनामा डेंगु परीक्षण गरिएकोमा ३१ जनामा डेंगु संक्रमण भेटिएको कार्यालयले जनाएको छ । 

कार्यालयका किट नियन्त्रक राम केसी डेंगु संक्रमण दर घट्दै गएपनि त्रास उत्तिकै रहेको बताउँछन् । “यसको सिजन सेप्टम्बरबाट सुरु हुन्छ, अहिले अलि चाँडो संक्रमण देखियो,” उनले भने, “तर यसको संक्रमणको जोखिम कात्तिकसम्म हो ।”

वर्षा रोकियो भने यसको संक्रमण अझ घट्ने र वर्षा निरन्तर भएमा बढ्ने सम्भावना उत्तिकै रहेको उनले बताए । तथ्यांक अनुसार भरतपुरका अस्पतालमा उपचार गरिएका बिरामीमध्ये चितवन जिल्लाका २ हजार ३ सय ९०, नवलपरासीका ३ सय २२, मकवानपुरका ६१ जना र अन्य जिल्लाका ३ सय ६५ जनामा डेंगुको संक्रमण देखिएको थियो ।