दाङ । पश्चिम नेपालका जनयुद्धका कमाण्डरको रुपमा परिचित पोष्टबहादुर बोगटि ‘दिवाकर’ को मंगलबार दाङमा एक कार्यक्रमको आयोजना गरी सम्झना गरिएको छ ।

दश वर्षे जनयुद्धको आधार क्षेत्र पश्चिम कमाण्डको नेतृत्व गर्ने माओवादी नेता पोष्टबहादुर बोगटी ‘दिवाकर’ को २०७१ भदौ ३० गते निधन भएको थियो । पोष्टबहादुर बोगटि स्मृति प्रतिष्ठानले आज एक कार्यक्रमको आयोजना गरी उनको सझना गरेको हो । पोष्टबहादुर बोगटि स्मृति प्रतिष्ठान दाङ उपत्यका बाहिरको पहिलो शाखा हो । 

बोगटीले कम्युनिष्ट आन्दोलनमा गरेको योगदान र उनको जीवनिको चर्चा गर्दै अहिलेका सबै एजेण्डा जनयुद्धले स्थापित गरेको र जनयुद्ध सफल बनाउने मुख्य व्यक्ति नै बोगटी भएको दाबी वक्ताहरुको थियो ।

सभालाई सम्वोधन गर्दै नेपाल कम्युनिष्ट पार्टी (नेकपा) का केन्द्रीय सदस्य एवं ५ नम्बर प्रदेश सचिव जगप्रसाद शर्मा ‘अपार’ले बोगटी नभइदिएको भए नेपाली राजनीति यति चाँडो यो स्थितिमा नआउने दाबी गरे । जनताको बीचमा रहेर पार्टीको नीति लागु गर्ने बोगटी एक जननेता भएको औल्याउँदै उनले पार्टीका शीर्ष नेताहरुलाई सन्तुलनमा राख्नेदेखि युवाहरुलाई उत्साहित गरेर जनयुद्धका कमाण्डर भएको उनको तर्क थियो ।

पोष्टबहादुर स्मृति प्रतिष्ठानका केन्द्रीय सदस्य निर्मल आचार्यले वोगटी सामाजिक क्षेत्रबाट स्थापित नेता भएको औल्याउँदै उनको दूरदर्शी राजनीतिक सोंच आज पर्यन्त लागु भइरहेको बताए । 

नेपाल कम्युनिष्ट दाङका संस्थापक सचिव नारायणप्रसाद शर्माले आजका दिनमा इमान्दार कम्युनिष्टको भूमिका के भनेर खोजी गर्नुपर्ने अवस्था आएको बताए । नेकपाका केन्द्रीय सदस्य एवं दाङ इञ्चार्ज जीवन गौतमले बोगटीको निष्ठा र क्रान्तिकारितालाई पछ्याउन सके मात्रै स्मृति दिवस मनाउनुको सार्थकता हुने बताए ।