बाह्रखरी समीक्षा
केपी शर्मा ओलीको सरकार ढालेर पुष्पकमल दाहाललाई प्रधानमन्त्री हुन सघाएको नेपाली कांग्रेसले दाहाल मन्त्रिपरिषद् बनेको २३ दिनपछि मात्र आफ्नोतर्फबाट सरकारमा प्रतिनिधित्व बढाएको छ । पहिले एक जना उपप्रधान मन्त्री तथा एक मन्त्रीमात्र पठाएको कांग्रेसले हिजो राति थप तेह्र मन्त्रीको नाम प्रधानमन्त्रीलाई बुझाएको थियो । अब दाहाल मन्त्रिपरिषद्मा कांग्रेसका १५ मन्त्री रहने भएका छन् ।
नेपाली कांग्रेसको नयाँ मन्त्री चयन हेर्दा कांग्रेसभित्र स्पष्टरूपमा चार गुट बनेको देखिएको छ । एउटा संस्थापन पक्ष शेरबहादुर देउवाको गुट, अर्को विपक्षी रामचन्द्र पौडेलको समूह, त्यसपछि तेस्रो धार कृष्णप्रसाद सिटौला समूह र चौथो खुमबहादुर खड्काको गुट । अहिलेको भागवन्डाअनुरूप संस्थापनले आठ मन्त्रालय पाएको छ भने विपक्षले पाँच र अन्य दुई समूहले एक एक मन्त्रीमा चित्त बुझाएका छन् ।
थपिएका मन्त्रीहरूमा अर्जुननरसिंह केसी – सहरी विकास, प्रकाशशरण महत – परराष्ट्र, बालकृष्ण खाण – रक्षा, सूर्यमान गुरूङ – श्रम, केशवकुमार बुढाथोकी –सामान्य प्रशासन, जीवनबहादुर शाही – पर्यटन, रोमी गौचन थकाली – वाणिज्य, नवीन्द्रराज जोशी – उद्योग, हृदयराम थानी – सहकारी तथा गरिबी निवारण, सीतादेवी यादव – शान्ति तथा पुनर्निर्माण, दीपक गिरी – सिंचाई, शंकर भण्डारी – वन र गगन थापा – स्वास्थ्य मन्त्री रहेका छन् ।
अन्नपूर्ण पोस्टबाहेक आज प्रकाशित अधिकांश दैनिकले यही समाचारलाई मुख्य समाचार बनाएका छन् ।
क्रिकेटका नाममा ‘मानव तस्करी’
नेपालबाट क्रिकेट खेल्न जापान गएका १८ मध्ये ९ जना खेलाडी जापानमा नै लुकेर बसेको र सो सम्बन्धमा अन्तर्राष्ट्रिय क्रिकेट काउन्सिल (आईसीसी) ले चासो देखाएको समाचार आजको अन्नपूर्ण पोस्टको मुख्य समाचार बनेको छ । सो समाचारअनुसार काठमाडौंको एउटा एफसी नामक क्लबले केही स्थापित क्रिकेटर र केही नचिनिएका अनुहारलाई जापानमा गएर मैत्रीपूर्ण क्रिकेट म्याच खेल्ने भनेर लिएर गएकोमा र आधाभन्दा बढी व्यक्ति लुकेर बसेका छन् । यस विषयमा आईसीसीले चासो देखाएका कारण खेलकुद मन्त्रीले पनि विशेष ध्यान दिएको पोस्टले लेखेको छ । त्यस टिममा जापान गएर फर्केका एक खेलाडीको भनाइसमेत राखेर बनाइएकाले समाचार विश्वसनीय देखिन पुगेको छ ।
गायकको सम्मान
‘वारि जमुना पारि जमुना’ भन्ने कालजयी लोक गीत गाउने गायक खेमराज गुरुङको मृत्युको समाचार धेरै पत्रिकाले प्रथम पृष्ठमा दिएनन् । समीक्षित पत्रिकामध्ये हिमालय टाइम्सले मात्र गायक गुरुङको सो समाचारलाई प्रथम पृष्ठको एन्करमा स्थान दिएको छ । कान्तिपुर र नयाँ पत्रिकाले सो समाचारलाई स्काई प्यानेल (मास्टहेड मुनि) हाइलाइट गरेरभित्र लगेका छन् ।
दैनिक एक निर्देशन
आजको राजधानी दैनिकले प्रधानमन्त्री पुष्पकमल दाहालले दिनको सरदर एक निर्देशन दिएका छन् भनेर एन्कर समाचार प्रकाशित गरेको छ । साउन २० गते प्रधानमन्त्री पदको शपथ खाएको र त्यसको दुई दिन बधाई तथा भेटघाट कार्यक्रममा बिताएका प्रधानमन्त्रीले त्यसपछिका दिनमा दिनहुँजस्तो विभिन्न निकायमा केही निर्देशन दिने गरेका रहेछन् । राजधानीमा टेनिस रोकाले लेखेको समाचारअनुसार साउन २३ गते उनले सरकारका सचिवहरूलाई तीन दिनभित्र परिणाममुखी योजना पेस गर्न निर्देशन दिए । रोका लेख्छन्, सरकार प्रमुखका हैसियतले निर्देशन दिनु त ठीकै हो तर कतिपय ठाउँमा एउटा कार्यालय प्रमुखले दिनेजस्तो निर्देशनसमेत प्रधानमन्त्रीले दिएका छन् । टेलिकमको रिचार्जमा देखिएको समस्या समाधान गर्न निर्देशन, साझा बस थप्न निर्देशन, नक्कली डाक्टरलाई काममा नलगाउन निर्देशन, एक दलितको हत्यामा छानविन समिति बनाउने, कालाबजारी अन्त्य गर्नेजस्ता उदाहरण राजधानीले दिएको छ । तर करिब २३ दिनमा उल्लेख्य २३ वा २० निर्देशन भनेर गन्ती नै गरेर देखाइएको भने छैन ।
सम्पादकीय
आजको कान्तिपुरले नेपालका नेता तथा उच्च पदस्थ व्यक्ति उपचारका नाममा विदेश जाने प्रवृत्तिको विरोधमा सशक्त सम्पादकीय लेखेको छ । पूर्वराष्ट्रपति रामवरण यादवले आफ्नो उपचार अमेरिकामा गराउन भनेर सरकारसँग करिब एक करोड रुपियाँभन्दा बढी माग गरेको सन्दर्भबाट सम्पादकीयको उठान गरिएको छ । तर, यादवमात्र होइन उपचारार्थ एमाले अध्यक्ष तथा पूर्व प्रधानमन्त्री केपी शर्मा ओली थाइल्यान्ड गएको र नेपाली कांग्रेसका सभापति शेरबहादुर देउवा सिंगापुर जान लागेको प्रसंगसमेत कान्तिपुरले जोडेको छ । साथै यादव राष्ट्रपति हुँदा वीर अस्पतालमा नै गएर लिएको उपचारको सर्वत्र कति प्रशंसा भएको थियो भनेर सम्पादकले सम्झाएका पनि छन् । उपचारका नाममा विदेश जाने र त्यस्तो उपचारको खर्च राज्यकोषबाट व्यहोर्ने कार्यलाई निरुत्साहित गर्न पनि कान्तिपुरले आह्वान गरेको छ ।
आजका हिमालय टाइम्स र अन्नपूर्ण पोस्टले प्रधानमन्त्री दाहालका विशेष दूत र तिनले दिएको सन्देशले उठेको विवादका सन्दर्भमा सम्पादकीय लेखेका छन् । राजधानीले आगलागीको अवस्थामा दमकलको समस्याका विषयमा सम्पादकीय लेखेको छ । गोरखापत्रले सरकारको एक हजार विद्यालयलाई नमुना विद्यालय बनाउने निर्णयमा सम्पादकीय लेख्दै त्यसले आशाको किरण जगाएको भनेर लेखेको छ ।
नागरिकले दाहाल सरकारलाई आकार लिन सकस भएकोमा सम्पादकीय लेखेको छ, जुन विषय आजको मन्त्रिपरिषद विस्तारपश्चात समाप्त हुनेछ । नयाँ पत्रिकाले अरब देशमा नेपालीका लागि रोजगारीका अवसर कम हुँदैगएको अवस्थामा स्वदेशमै रोजगारीका अवसर सिर्जना गर्नुपर्ने माग गर्दै सम्पादकीय लेखेको छ ।
प्रकाशित मिति: शुक्रबार, भदौ १०, २०७३ ११:१८
प्रतिक्रिया दिनुहोस्