काठमाडौं । राष्ट्रिय गौरवको आयोजनाको रुपमा रहेको बूढीगण्डकी जलविद्युत आयोजना प्रभावितले आगामी मंसिर २१ गते अघिसम्म गोरखा आरुघाट र धादिङ खहरेको मुआब्जा नतोकिए निर्वाचन बहिष्कार गर्ने चेतावनी दिएका छन् ।

गोरखाको आरुघाट र धादिङको खहरे बजार क्षेत्र बन्दै गर्दै उनीहरुले मंसिर २१ गतेसम्ममा मुआब्जा नतोकिए निर्वाचन बहिष्कार गर्ने चेतावनी दिएका हुन् । उनीहरुले सोमबार पनि दुवै क्षेत्र बन्द गर्ने निर्णय गरेका छन् ।

आफूहरुले विगतमा पटक-पटक सरकारलाई मुआब्जा वितरणको लागि दबाब दिएपनि सुनाई नभएको भन्दै निर्वाचन अगाडि मुआब्जा नतोकिए निर्वाचन बहिष्कार गर्ने निर्णय गरेको बूढीगण्डकी जलविद्युत आयोजना सरोकार समितिका अध्यक्ष दिनेश कुमार ढकालले जानकारी दिए । 

ढकालले भने,  ''हामीले आरुघाट र खहरे बजार क्षेत्र दिँदैनौं भनेका हौं तर दुई जिल्लाका नेताहरुले र बूढीगण्डकीका पदाधिकारीहरुले राष्ट्रिय गौरवको आयोजना बन्न लागेको छ दिनपर्छ भनेर हामीले दियौं ।  आरुघाट र खहरे बजारबाहेक २७ गाविसमा मुआब्जा वितरण गर्ने थालिएको छ । हाम्रो जग्गा रोक्का गरिएको पनि २ वर्ष भयो । यता आयोजना बनाउन भनेर सरकारले चिनियाँ कम्पनीको स्वामित्वमा रहेको गेजुवा कम्पनीलाई दिइसक्यो । हाम्रो मुआब्जा पनि निर्धारण भएको छैन ।''

आफूहरुको माग कुनै पनि सरकारले पूरा नगरेको भन्दै आफूहरुले केही दिनमा धादिङ र गोरखा ठप्प पार्ने निर्णय गरेको उनले बताए । 

उनले सरकारले मुआब्जा तोक्न नसकिए बूढीगण्डकी प्रभावितको जग्गा फुकुवा हुनुपर्ने आयोजना प्रभावितको माग रहेको बताए । उनले अगाडि थपे,  ''सरकारले आरुघाट र खहरे बजारको मुआब्जा तोक्न सक्दैन भने हाम्रो जग्गा फुकुवा गरियोस् । न हामीलाई सरकारले उचित किसिमको ठाउँमा सार्ने निर्णय गरेको छ, न त हामीले भूकम्पले भत्काएको घर बनाउन पाएका छौं । चिनियाँ कम्पनीलाई आयोजना दिइसकेपछि त हामी आयोजना बन्ने कि नबन्ने भन्ने दोधारमा पनि छौं ।''

गोरखा र धादिङका आयोजना प्रभावितले दुवै बजार क्षेत्रको मुआब्जा ३० लाख प्रतिरोपनि माग राखेको पनि ढकालले जानकारी दिए ।