काठमाडौं । मुलुकका विभिन्न ठाँउमा भएको बाढी पहिरो लगायत दैविक प्रकोपले पशुपन्छी क्षेत्रमा सवा १० अर्ब क्षति भएको छ । शुक्रबार पशुपन्छी विकास मन्त्रालयले पत्रकार सम्मेलन गरी शुक्रबार विहानसम्मको प्रारम्भिक क्षतिको विवरण सार्वजनिक गर्दै यस्तो तथ्यांक सार्वजनिक गरेको हो ।
कार्यक्रममा प्रवत्ता श्याम पौडेलले प्रत्यक्ष र अप्रत्यक्ष गरी समग्रमा १० अर्ब १७ करोड ८८ लाख रुपैयाँ क्षति भएको बताए । “अनुमानित १ अर्ब ३७ करोड ७८ लाख रुपैयाँको विभिन्न पशुधनको मृत्यु तथा पशुजन्य सामाग्रीको नष्ट भएको छ,” उनले भने “त्यस्तै पशुजन्य उत्पादनतर्फ २ अर्ब ५० करोड १० लाख रुपैयाँ प्रत्यक्ष क्षति भएको छ ।”
उनका अनुसार विभिन्न पशुजन्य उत्पादनमा ६ अर्ब ३० करोड बराबरको अप्रत्यक्ष रुपमा क्षति भएको छ ।
कार्यक्रममा मन्त्रालयले बाढी र पहिरोबाट पशुपालक कृषकहरुमा परेको समस्यालाई तत्काल सम्बोधन गरिएका कार्यक्रमबारे पनि प्रवक्ता पौडेलले जानकारी दिएका थिए ।
