काठमाडौं । राजधानीस्थित भृकुटीमण्डपमा २१ औं अन्तर्राष्ट्रिय पुस्तक प्रदर्शनी सुरु भएको छ । 

नेपाल पुस्तक तथा स्टेशनरी महासंघको सहकार्यमा ग्लोबल एक्शपोजिसनले आयोजना गरेको उक्त प्रर्दशनी बुधबारबाट सुरु भएको हो । 
यस अन्तराष्ट्रिय प्रदर्शनीले प्रत्येक पुस्तकप्रेमीको चाहनालाई समेट्दै पठन संस्कृतिको विकास र पठन शैलीको निरन्तरताका लागि पुस्तक प्रदर्शनी आयोजना गरिएको आयोजकले जनाएको छ । 

राष्ट्रिय तथा अन्तर्राष्ट्रिय प्रकाशन संस्थाहरुले ८० वटा स्टलमार्फत सहभागीता जनाएको यस प्रदर्शनीमा ५० हजार अवलोकनकर्ताको सहभागिता रहने आयोजकको विश्वास रहेको छ । 

बुधबारबाट सञ्चालित यो प्रदर्शनी एक सातासम्म जारी रहने आयोजकले बताएको छ । 

प्रदर्शनीमा नेपाली आख्यानको खोजी
यस प्रदर्शनीमा अंग्रेजीका नेपाली आख्यानको बढी खोजि गरिएको पुस्तक प्रकाशन संस्थाका प्रतिनिधिहरुले बताएका छन् । 
“नेपाली आख्यानको माग बढी रहेको छ,” प्रदर्शनीमा आएका पाठकको रुचिबारे शिखा बुक्स बागबजारका प्रोपाइटर पुष्पराज पौडेलले बाह्रखरीसँग भने, “पछिल्लो पुस्तामा पनि पुस्तक पढ्ने संस्कार हुर्कंदो छ, नेपाली आख्यानको माग बढी छ ।”
सुस्त शाझा
सरकारी निकायअन्तर्गत सञ्चालित साझा प्रकाशनसमेतको स्टल रहेको उक्त प्रदर्शनीमा साझा प्रकाशनको तयारी सुस्त देखिएको छ । नेपाली साहित्यका दर्जन बढी विधाका पुस्तक प्रकाशित गरिसकेको साझाले आफ्ना सम्पूर्ण पुस्तकहरु स्टलमा राख्न सकेको छैन ।