विराटनगर । नेपाली कांग्रेसले सरकारको विरोधमा प्रदेश–१ को राजधानी विराटनगरमा जुलुस र विरोध सभा आयोजना गरेको छ । कांग्रेस महामन्त्री शशांका कोइरालाको प्रमुख आतिथ्यमा भएको कार्यक्रममा कार्यकर्ताको उल्लेख्य समभागिता थियो । तीनपैनी चोकबाट तरुण दलले मोटरसाइकल र्याली निकालेर शुरु भएको जुलुस मनेरोड हुँदै महेन्द्र चोकमा पुगेर सभामा परिणत भयो । 

सभालाई सम्बोधन गर्दै महामन्त्री कोइरालाले सरकार भ्रष्टाचार, अधिनायकवाद र अनियमिततामा लिन भएको आरोप लगाए । भने, “तीन वर्षसम्म चुप लागेर बसेका हामी अन्ततः सडकमा आउनु परेको छ । सरकारले जनहितका कामै गर्न सकेन ।” 

उनले अबको निर्वाचनमा एक भएर अघि बढ्ने र देश बनाउने जिम्मा कांग्रेसले लिने बताए । कांग्रेसको आदर्श, इतिहास र विचारलाई कसैले पराजित गर्न नसक्ने बताउँदै उनले आर्थिक समृद्धिको अबको बाटो भएको सुनाए । 

कांग्रेसले विराटनगरमा आयोजना गरेको कार्यक्रममा सहभागी हुन मोरङका १७ वटै स्थानीय तहबाट मोटरसाइकल र्याली निकालेको थियो । कार्यकर्ताहरु बस चढेर कार्यक्रममा सहभागी हुन विराटनगरमा जम्मा भएका थिए । 

यसअघि कोइराला निवासमा बिहान आयोजित पत्रकार भेटघाटमा कोइरालाले कम्युनिष्ट सरकारको रवैयाबाट जनता दिक्क भएको बताउँदै बेरोजगार युवालाई स्वदेशमै रोजागरी दिने र आर्थिक समृद्धिको बाटो समाउने ठूलो चुनौती थपिएको बताएका थिए । भने, “कोभिडले सबै क्षेत्र प्रभावित बनेको छ । यसबाट मुलुकलाई पार लगाउन सरकार असफल देखिएको छ ।” उनले आम चुनावपछि  कांग्रेसको सरकार बने हिन्दु राष्ट्रको विषयमा जनमत संग्रह गर्न सकिने पनि बताए । 

कोइराला परिवारबाट पार्टीको सभापतिमा एक जनामात्र उमेदवार बन्ने र यस विषयमा आफूले डा. शेखर र सुजातासँग छलफल गरिरहेको पनि बताए । भने,“हामीमध्येबाट कोही एकजना उमेदवार बन्ने हो ।”