काठमाडौं । गणपुरक संख्या नपुगेपछि संवैधानिक परिषद्को आजको बैठक स्थगित भएको छ । आज ९ बजे संवैधानिक परिषद्को बैठक बोलाइएको थियो । बैठकमा प्रधानमन्त्री केपी शर्मा ओली, प्रधानन्यायाधीश चोलेन्द्र शमशेर राणा र राष्ट्रियसभाका अध्यक्ष गणेश तिमिल्सिनामात्रै उपस्थित भएपछि आवश्यक संख्या नपुगेको हो ।

“आजको बैठक कोरम नपुगेर स्थगित भयो । विपक्षी दलका नेता र सभामुख नआएपछि बैठक बस्न सक्ने अवस्था संवैधानिकरूपमा छैन,” स्रोतले भन्यो ।

प्रमुख प्रतिपक्षी दल तथा नेपाली काङ्ग्रेसका सभापति शेरबहादुर देउवा र सभामुख अग्नि सापकोटा उपस्थित नभएपछि बैठक अनौपचारिक गफगाफमा परिणत भएको स्रोतको भनाइ छ । काङ्ग्रेसले सरकारको कार्यशैलीप्रति तीव्र असन्तुष्टि जनाउँदै सोमबार देशव्यापी प्रदर्शन राखेको छ । त्यसकै पूर्वसन्ध्यामा राखिएको संवैधानिक परिषद्को बैठकमा नजान देउवालाई चर्को दबाब थियो ।

पार्टीभित्रैको विवादका कारण सभामुख पनि उपस्थित नभएपछि बैठक स्थगित हुन पुगेको स्रोतको जिकिर छ ।