नयाँ दिल्ली । भारतले संयुक्त राज्य अमेरिकासँग सैन्य सम्झौताअन्तर्गत संवेदनशील स्याटेलाइट डाटा सेयर गर्नका लागि स्याटेलाइट डाटा प्याक्टमा हस्ताक्षर गर्ने भएको छ । यस क्षेत्रमा चीनको बढ्दै गइरहेको शक्तिलाई काउन्टर गर्ने विषयमा दुबै पक्षबीच उच्‍चस्तरीय वार्ता भइरहेको छ । 

संयुक्त राज्य अमेरिकाका विदेशमन्त्री माइक पोम्पेओ र रक्षामन्त्री मार्क इस्पर सोमबार नयाँ दिल्ली पुगेका थिए । दशकौंपछि भारत-चीनबीच उत्तरी सीमा क्षेत्रमा तनाव सिर्जना भएपछि भारतले अमेरिकासँगको सहकार्यलाई बढावा दिएको हो । 

संयुक्त राज्य अमेरिकाले पनि चीनमाथि कूटनीतिक दबाब सिर्जना गरेको छ । चीनले कोरोना भाइरस महामारी नियन्त्रण गर्न नसक्दा विश्वभर फैलिएको भन्दै अमेरिकाले आलोचना गरेको छ । त्यसैगरी साउथ चाइना सी र हङकङ राष्ट्रिय सुरक्षा कानुन लागु गरेको भन्दै अमेरिकाले चीनको चर्को आलोचना गरिरहेको छ । 

अमेरिकी रक्षामन्त्री माइक पोम्पेओले मंगलबार दुई प्रजातान्त्रिक मुलुकहरुका लागि नयाँ अवसर भएको बताएका छन् । उनले भने, "आज दुई प्रजातान्त्रिक मुलुकका लागि नयाँ अवसर हो । हामीले एकसाथ धेरै काम गर्नुपर्ने छ । हामीले वुहानबाट सुरु भएको महामारी, चिनियाँ कम्युनिस्ट पार्टीले उत्पन्‍न गराएको खतरा, सुरक्षा र स्वतन्त्रताका विषयमा छलफल गर्नेछौं ।" - अलजजिरा