एजेन्सी । च्याम्पियन्स लिग फुटबलअन्तर्गत आज (शुक्रबार) राति स्पेनिस क्लब बार्सिलोना र जर्मन क्लब वायर्न म्युनिख प्रतिस्पर्धा गर्दै छन् । पर्चुगलमा हुने दुई टोलीबीचको खेल नेपाली समयअनुसार राति १२:४५ बाट सुरु हुनेछ ।

यो सिजन वायर्न तुलनात्मक रुपमा बार्सिलोनाभन्दा बलियो छ । बार्सिलोना र वायर्नले खेलेका पछिल्ला १० खेलमा पनि वायर्न नै बलियो साबित भएको छ । जर्मन च्याम्पियन क्लबले यो सिजन च्याम्पियन्स लिग फुटबलको उपाधि जित्ने योजना बनाएको छ ।

बार्सिलोना र वायर्न युरोपियन प्रतिस्पर्धामा १० पटक भिडेका छन् । जसमा वायर्नले ६ जित निकालेको छ । बार्सिलोनाले भने जम्मा दुई जित निकालेको छ । र दुई टोलीबीचका दुई खेल बराबरीमा रोकिएका छन् ।

सन् २०१४-१५ को सिजनमा बार्सिलोनाले वायर्नलाई सेमिफाइनल राउन्डबाट आउट गरेको थियो । उक्त सिजन बार्सिलोनाले च्याम्पियन्स लिगको उपाधि पनि जितेको थियो । त्यस्तै वायर्नले बार्सिलोनालाई सन् २०१२-१३ को सिजन सेमिफाइनलबाट आउट गराएको थियो । उक्त सिजन वायर्नले उपाधि जितेको थियो ।

बार्सिलोना र वायर्न सन् २००८-०९ को सिजन पनि भिडेका थिए । जसमा बार्सिलोनाले जित हात पारेको थियो । पहिलो लेगमा १-१ गोलको बराबरी खेलेको बार्सिलोनाले दोस्रो लेगमा ४-० गोलको जित हात पार्न सफल भयो ।

त्यसअघि सन् १९९८-१९९९ मा वायर्नले बार्सिलोनाविरुद्ध समूह चरणका दुवै लेगमा जित हात पारेको थियो । यता युरोपा लिगअन्तर्गत सन् १९९५-९६ को सिजन बर्यानले बार्सिलोनाविरुद्ध जित हात पारेको थियो । पहिलो लेगमा २-१ गोलको जित हात पारेको वायर्नले दोस्रो लेगमा भने २-२ गोलको बराबरी खेलेको थियो । वायर्न अघिल्लो चरणमा प्रवेश गरेको थियो ।
 
आजको खेलमा पनि वायर्न बार्सिलोनाभन्दा बलियो नै देखिने अनुमान गरिएको छ । वायर्नको पछिल्ला खेलहरुको नतिजा र बार्सिलोनाका पछिल्लो खेलका नतिजा हेर्दा वायर्न बलियो अवस्थामा छ ।