काठमाडौं । निर्वाचन आयोगले चैत २० गतेसम्म स्थानीय तहको निर्वाचनमा भाग लिने मतदातको नामावलीलाई अन्तिम रुप दिनेगरी धमाधम काम गरिरहेको छ । निर्वाचन आयोगका एक अधिकारीकाअनुसार १ करोड ४० लाख मतदाता पुग्ने आयोगले अनुमान गरे पनि संख्या १ करोड ३८ लाख नजिक हुन सक्नेछ ।
निर्वाचन आयोगको केन्द्रीय कार्यालयमा प्राविधिकहरुले नयाँ स्थानीय तहको संरचनाअनुसार मतदातको नाम परिवर्तन गरिरहेको छ ।
आयोगले दिएको जानकारीअनुसार मतदाताको नामावली वडा र मतदान केन्द्रअनुसार मिलाउने काम भइरहेको छ । स्थानीय तहमा हाल ६ हजार ६ सय ८३ वडा कायम गरिएको छ । सोही अनुसार मतदातको नामावलीलाई अन्तिम रुप दिने तयारी भएको आयोगका प्रवक्ता सूर्यप्रसाद शर्माले जानकारी दिए ।
आयोगले निर्वाचनको मिति घोषणा भएको दिनसम्म १८ वर्ष उमेर पुगेको र मतदाता नामावलीमा नाम भएका व्यक्ति निर्वाचनमा भाग लिन योग्य हुने जनाएको छ ।
आयोगले मतदाताको जिल्ला, स्थानीय तह, वडा र मतदाता केन्द्र रहने गरी अध्यावधिक गरिरहेको हो । यसअघि जिल्ला, गाविस वा नगरपालिका, वडा र मतदानकेन्द्र अनुसार मतदाताको नामवली राख्दै आएको थियो ।
मतदातको ठेगानाको नाम परिमार्जनको काम चलिरहे पनि अहिलेसम्म पुरानै स्थानीय निकायको साविक ठेगानाअनुसार आफ्नो र आफ्नो वडाको मतदाता नामावली छ वा छैन हेर्न सकिनेछ ।
आफ्नो मतदाता नामावली हेर्न यहाँ क्लिक गर्नुहोस्