काठमाडौं । संसदीय सुनुवाईबाट प्रधानन्यायाधीशमा अस्वीकृत भएपछि पनि न्यायाधीशका रूपमा सर्वोच्च अदालत फर्किएका दीपकराज जोशीमाथि महाभियोग लगाउने तयारी सुरु भएको छ ।

जोशीलाई महाभियोग लगाउन नेपाल कम्युनिस्ट पार्टीका सांसदरूले हस्ताक्षर संकलन शुरू गरेका छन् । ने क पाका सांसद कृष्ण राईका अनुसार जोशीको महाभियोगका लागि हस्ताक्षर संकल शुरू भएको छ । महाभियोगको प्रस्ताव शुक्रबार दर्ता गर्ने कार्यक्रम छ ।

महाभियोगको प्रस्ताव दर्ता गर्न एक चौथाइ सांसद (८३ जना) को हस्ताक्षर आवश्यक पर्छ । संसदमा ने क पाका २१४ जना सांसद छन् । “उनीविरुद्ध महाभियोग प्रस्ताव तयार भइसकेको छ । सांसदहरूले हस्ताक्षर गरिरहनुभएको छ, आवश्यक संख्या पुग्छ,” स्रोतले भन्यो ।

सांसदहरूले सोधेको प्रश्नको चित्तबुझ्दो जवाफ नआएको भन्दै भदौ १८ गते प्रस्तावित प्रधानन्यायाधीशमा संसदीय सुनुवाइ समितिले नाम अनुमोदन नगरेपछि उनी बिदामा बसेका थिए ।

त्यसपछि नवनियुक्त प्रधानन्यायाधीश ओमप्रकाश मिश्रलाई स्वागत गर्नका लागि न्यायाधीश जोशी सर्वोच्च अदालत गएका थिए ।