काठमाडौं । खानेपानीमन्त्री उमाकान्त चौधरीले काठमाडौंवासीलाई खानेपानीको अभाव हुन नदिने बताएका छन् ।

सोमबार सुन्दरीजलमा पूर्वप्रधानमन्त्री कृष्णप्रसाद भट्टराईको सालिक शिलान्यास गर्दै उनले वाग्मती नदीको पानीलाई सुन्दरीजलमा प्रशोधन गरी ५–६ करोड लिटर र भूमिगत सतहको ५ करोड लिटरभन्दा बढी पानीको व्यवस्थापन गरेर काठमाडौंवासीलाई खानेपानीको अभाव हुन नदिने स्पष्ट पारे ।

उनले मेलम्चीको विकल्पका रूपमा अरू स्थानबाट पनि काठमाडौं उपत्यकामा पानी ल्याउने विषयमा अध्ययन भइरहेको जानकारी दिए ।

मन्त्री चौधरीले बाढीबाट मेलम्चीको सुरुङलाई जोगाउनका लागि टनेल बन्द गरिएको भन्दै मनसुन सकिनेबितिकै मेलम्चीको पानी ल्याइने बताए ।

एसियाली विकास बैंकको टोलीले मेलम्ची खोलाको भौगर्भिक अवस्थाको अध्ययन गरिरहेको पनि उनले बताए । मन्त्री चौधरीले सो अध्ययन प्रतिवेदनानुसार आउँदो आर्थिक वर्षदेखि पहिरो नियन्त्रणको काम अघि बढाइने उल्लेख गरे ।

गएको चैत २४ गते बसेको मन्त्रिपरिषद्को बैठकले सुन्दरीजलको सुरुङनजिक भट्टराईको सालिक बनाउने निर्णय गरेको थियो ।