जनकपुरधाम । मधेस प्रदेशको भूमि व्यवस्था, कृषि तथा सहकारी मन्त्रालयमा तलाबन्दी गरिएको छ । शीतभण्डार निर्माणको काम सम्पन्न भएपनि रकम भुक्तानी नगरेको भन्दै निर्माण संस्थाका प्रतिनिधिहरूले मन्त्रालयमा तलाबन्दी गरेका हुन् । 

प्रदेश सरकारले ०७६ जेठ २९ गते शीतभण्डार निर्माण गर्न कृषक समूहसँग सम्झौता गरेको थियो । तीनवटा निर्माण संस्थाको चार करोडभन्दा बढी रकम भुक्तानी हुन बाँकी रहेको बताइएको छ । भुत्तानीसँगै समयमा मलखाद र बिउबिजन उपलब्ध गराउनुपर्ने, प्राकृतिक विपद्का कारण किसानलाई भएको क्षतिपूर्ति दिनुपर्नेलगायतका माग राखेर उनीहरू आन्दोलित भएका हुन् । 

कृषि मन्त्रालयमा जनता समाजवादी पार्टी (जसपा)बाट विजयकुमार यादव मन्त्री छन् । मुख्यमन्त्री लालबाबु राउतसँग उनको टसल बढेपछि यादवलाई अर्थ मन्त्रालयबाट हटाएर कृषि मन्त्रालयको जिम्मेवारी दिएको थियो ।

कतिपयले अहिलेको तालाबन्दी मुख्यमन्त्रीकै डिजाइनमा भएको हुनसक्ने बताएका छन् । जसपाका धनुषा अध्यक्ष एवं मुख्यमन्त्री राउत निकटका शेष नारायण यादवको नेतृत्वमा तलाबन्दी गरिएको हो ।