काठमाडौं । नेकपा एमालेका अध्यक्ष केपी शर्मा ओलीले एसपीपी आफ्नो समयमा ल्याएको र अहिले रोकिएको भन्दै राष्ट्रिय तथा अन्तराष्ट्रिय रूपमा ढाँटिएको बताएका छन् । मदन भण्डारीको ७१औं जन्मजयन्तिका अवसरमा आयोजित कार्यक्रममा उनले नेकपा माओवादी केन्द्रका अध्यक्ष पुष्पकमल दाहाल प्रचण्डप्रति लक्षित गर्दै उनले फट्याइँ गरिरहेको आरोप लगाए । 

“एकजना नेताले पटक–पटक भनिरहेका छन् । एसपीपी केपी ओलीको समयमा ल्याएको थियो । अन्तर्राष्ट्रियरूपमा पनि ढाँटिरहेका छन् । राष्ट्रियरूपमा पनि ढाँटिरहेका छन्,” ओलीले भने,“केपी ओलीको समयमा ल्याएको थियो मैले भूमिका खेलेर अहिले रोकाएँ भनेर । योभन्दा बढ्ता ढाँटको कुरो योभन्दा बढ्ता फट्याइँ के हुन्छ ?” उनले तत्कालीन रक्षामन्त्रीसमेत रहेका प्रधानमन्त्री सुशील कोइरालाले एसपीपीको अंग बन्न तयार छ भनेर निर्णय गरिएको बताए । 

ओलीले आफू प्रधानमन्त्री हुँदा कोइरालाकै आदेशअनुसार पत्र पठाइएको बताए । उनले पहिलेको पत्रसमेत देखाउन माग गरे । पत्रमा चलानी नम्बर र मिति टिपेक्स लगाएर हातले लेखिएको भन्दै पहिलेको पत्र देखाउन माग गरे । २७ अक्टोबर हातले लेखिएको भन्दै आफूलाई फसाउनका लागि छली काम गरेको आरोप लगाए । आफू प्रधानमन्त्री हुँदा एसपीपी सम्झौता भएको भए पनि गलत भएको बताए । 

ओलीले २०१९ मा नै एसपीपीलाई आफ्नो समयमा स्थगित गरिएको र अहिले एसपीपीबारे नयाँ ड्राप्ट ल्याएको आरोप पनि लगाए । एसपीपी फिर्ता गर्ने बताए पनि त्यसको खतरा कायमै रहेको उनको भनाइ छ । ओलीले राष्ट्रियता भन्ने कुरा तमासा गने, झुक्याउने, तमासा गर्ने चिज नभएको बताए । भूगोलदेखि समाजको हितका कुरा राष्ट्रियताभित्र पर्ने उनको भनाइ छ ।