साउथ इन्डिया । दक्षिण भारतीय चलचित्रका सुपरस्टार कमल हसन आफ्नो पछिल्लो चलचित्र ‘विक्रम’ मो ब्लकबस्टर सफलताले उत्साहित छन् । जुन ३ मा रिलिज भएको ‘विक्रम’ ले अहिलेसम्म वल्र्डवाइड भारु तीन सय करोडभन्दा बढि कमाइ गरिसकेको छ । यो चलचित्र यस वर्षको सबैभन्दा धेरै ग्रस कलेक्सन गरेको तमिल चलचित्र बनिसकेको छ । 

चलचित्रको करोडौँको कमाइबाट खुसी बनेका हसनले चलचित्रका निर्देशकलाई कार र सहायक–निर्देशकलाई मोटरसाइकल उपहार दिएका छन् । यति मात्रै नभएर अभिनेता कमल हसनले हालै आफूले कमाएको करोडौँ रुपैया कहाँ–कहाँ खर्च गर्ने भनेर बताएका छन् । 

हालै पत्रकार सम्मेलनमा बोल्दै बाँकी पैसाले आफ्नो बाँकी सबै ऋण चुक्ता गर्ने बताएका हुन् । उनी भन्छन्, “म अब आफ्नो सबै ऋण चुक्ता गर्नेछु । मन भर्नेगरी खान्छु र मेरो परिवार अनि साथीहरूलाई जे–जति दिन सक्छु दिन्छु । चाहे त्यो पछि म सँग केही बाँकी नहोस् । मलाई अब तेस्रो व्यक्तिसँग पैसा लिएर दोस्रो व्यक्तिलाई सहयोग गरेको देखावटी गर्नुपर्ने छैन । म एउटा राम्रो व्यक्ति बन्न चाहन्छु ।”

जम्मा भारु १५० करोड लगानीमा बनेको यस चलचित्रबाट कमल हसनले ५० करोड मात्रै पारिश्रमिक लिएका छन् । यस चलचित्रलाई हसनले आफ्नो ब्यानरमार्फत निर्माण गरेका हुन् । 

‘विक्रम’ सन् १९८६ मा रिलिज भएको सोही नामको सिक्वल हो, जसको लिड रोलमा कमल हसन नै थिए । यसको सिक्वेललाई लोकेश कनगराजले निर्देशन गरेका हुन् । चलचित्रमा कमलका साथै विजय सेतुपति, सूर्या, फराद फासिललगायत साउथ कलाकारहरूको अभिनय रहेको छ । हिन्दी र तेलुगु भाषामा ‘विक्रम’ लाई ‘विक्रम हिटलिस्ट’ नामबाट रिलिज गरिएको हो । नवभारत टाइम्स