काठमाडौं । पोर्चुगल पठाइदिन्छु भन्दै नक्कली कागजात समेत दिई ठगी गरेको आरोपमा एकजना पक्राउ परेका छन् । पक्राउ पर्नेमा काठमाडौं महानगरपालिका–४, बालुवाटार घर भई टोखा नगरपालिका–६, ग्रान्डी बस्ने रोहित प्रजापति भनिने ३५ वर्षीय रोजित श्रेष्ठ छन् ।

रोजितले बालुवाटारमा संयुक्त नेपाल अनाथ आश्रम असहाय समाज संस्था सञ्चालन गरेका र आफू उक्त संस्थाको केन्द्रीय अध्यक्ष भएको भन्दै ठगी गरेको पाइएको छ ।

उनले पोर्चुगलमा संस्थाको सेमिनार हुन लागेकोले पोर्चुगल पठाइदिन्छु भन्दै प्रलोभनमा पारी भिसा प्रक्रिया तथा हवाई टिकटका लागि आठ पीडितहरूबाट ३३ लाख ५० हजार रुपैयाँ रकम लिई ठगी गरेको पाइएको छ ।

काठमाडौं उपत्यका अपराध अनुसन्धान कार्यालय मीनभवनबाट खटिएको प्रहरीले रोहितलाई बालुवाटारबाट पक्राउ गरेको हो । साथै, पीडितहरूको नाममा जारी गरिएका हवाई टिकट तथा भिसा नक्कली भएको अनुसन्धानको क्रममा खुलेको प्रहरीले जनाएको छ ।